شعب الله المحتار!!!!!!! نضحك ولا نبكى

نعم لقد اصبحنا شعب الله المحتار بالحاء و ليست المختار بالخاء . اصبحت الحيرة و عدم التأكد هى اهم ما يميز قضايا الراى العام فى مصر . فلايوجد موضوع او قضية رأى عام واحدة اثيرت و خاصة فى الاونة الاخيرة الا و كانت الافترضات و التوقعات و الشائعات هى بطلتها الوحيدة .

مش مقتنع بكلامى طيب خد عندك

تقدر تقولى اصدق مين فى موضوع النقاب ؟ اصدق فضيلة شيخ الازهر و الكثير من علماء الازهر و السادة رؤساء الجامعات ؟

ولا اصدق الشيخ محمود المصرى و الشيخ محمد حسين يعقوب و ابو اسحاق الحوينى ؟

المشكلة انهم كلهم بيتكلموا بالقرأن و الاحاديث النبوية الشريفة !!!!!!!!

طيب لو سمعنا كلام شيخ الازهر و مؤيديه و طلع كلامهم غلط يبقى اكيد هانروح النار . صح ؟

طيب لو سمعنا كلام مشايخ قناة الناس ولبسنا بناتنا و اخواتنا و زوجاتنا النقاب طيب ماهو كده مش هايروحوا الجامعة ومش هايتعلموا و هايتخنوا و تطلع لنا جمعيات حقوق حواء و السيدة وزيرة الاسرة و السكان تقول لنا انتم متخلفين وجهلاء ولازم تروحوا السجن يا معارضين يا اوباش واخد بالك يا ارهابى منك ليه ؟؟؟؟؟؟

مش بقول لكم اننا شعب الله المحتار ؟؟؟؟؟؟؟؟؟؟؟؟؟

البيه لسه مش مقتع ؟؟؟؟؟ طيب خد قضية تانية

ايه اخبارك مع انفلونزا الخنازير ؟

وزارة الصحة و على لسان وزيرها بتقول ان الوباء قادم بشراسته لا محالة و بالفعل تم انشاء المقابر الجماعية ودا حتى قبل ما يجهزوا المستشفيات للمرضى يعنى الوباء جاى وجايب معاه الموت . صح ولا انا غلطان ؟؟؟؟؟؟؟؟

قوم ايه يطلع السيد وزير التعليم و يقولك دا مرض هش ضعيف فرفور فلاح خرسيس انا مش هلغى المدارس لازم الولاد يتعلموا حتى اخر نفس فى اعمارهم و عندا فيكم بقى هازود كثافة الفصول و مافيش ديتول ولا كمامة و هاكلم كل المحافظين علشان محدش يشيل الزبالة ويا انا يا انتم يا خنازير ( قصده يا شعب ) من الاخر كده .

ها لسه سيادتكم مش مقتنعيين اننا شعب الله المحتار طيب تعالى ادلع واكلمك فى الفن

جريدة تصدر وتحمل مانشيت القبض على الفنان الشهير فى شبكة للشواذ هو وكام فنان تانى . يقوم الفنان يكذب الخبر فى كل الصحف و المجلات و الفضائيات ويرفع قضية على الجورنال قليل الادب .

قوم الحج صاحب الجورنال الله يعمر بيته يروح المحكمة و يحلف بالطلاق انه عنده سى دى عليه ما يثبت الخبر . وتتأجل القضية .

يطلع خبر تانى يقولك ان الفنان دافع عن حقوق الشواذ اثناء دافعه عن نفسه . عادى!!!!!!!!!!!!!!!!!

طيب الدنيا كلها دافعت عن الفنان الكبير طيب ليه محدش دافع عن الاثنين التانيين ؟؟؟؟؟؟؟؟

اكيد انت كمان بقيت محتار صح ؟ ولا لسه طيب خد بقى كلام عن حبيبة قلبك الكورة

تفتكر مصر هاتكسب الجزائر فى استاد القاهرة و نروح كاس العالم و نرضب لاعيبه و جمهور الجزائر علقة موت بعد الماتش ؟

ولا مصر هاتخسر و هاتخرج من كاس العالم و برده هانضرب لاعيبة و جمهور الجزائر علقة موت بعد الماتش ؟

بالمناسبة هما استقروا على فارق الاهداف و لا نتيجة اللقائيين و لا المبارة الفاصلة و لا القرعة ؟

ياترى النهائى هايكون بين مين ؟؟؟؟؟؟ اقولك انا بقى يا سيدى

الفائز من مبارة مرتضى و شوبير هيلاعب الفائز من مبارة مدحت شلبى و علاء صادق على كأس الردح و التشريد و التسييح الكبرى .

اخيرا اقتنعتم اننا اصبجنا شعب الله المحتار ؟؟؟؟؟؟؟

لسه !!!!!!!!!!!!!!!!!

لا انا كده زهقت لو انت شايف ان الموضوع مافيهوش حيرة جاوب على الاسئلة اللى جاية و سيب اجابتك فى التعليق وانا اوعدك بجائزة تذكرة لحضور مبارة النهائى بتاعة شوبير ومرتضى و شلبى و صادق شامله لقاء مع نور الشريف و خالد ابو النجا وحمدى الوزير مع سهرة جميلة فى مقبرة جماعية و مشروب مصل انفلونزا الخناير و هايكون معاك مزز موز موز موز بدون نقاب كمان يا سيدى بس انت جاوب على الاتى

1- مين هايحكم مصر بعد مبارك ؟

2- ايه هى اسباب خسارة فاروق حسنى لمعركة اليونسكو ؟

3- هل صحيح سيتم احلال السيارات الملاكى القديمة ؟

4- هل سيتم اعدام هشام طلعت مصطفى ؟

5- هل تستقر البورصة المصرية ؟

6- هل يستمر العمل بمشروع الخط الثانى لمترو الانفاق بعد حادث الهبوط الشهير ؟

7- هل سيعود نور الشريف لمطلقته بوسى ؟

8- هل عمرو دياب هاينزل شريط جديد مع شريط محمد فؤاد المنتظر ؟

9- هل يستمر سعر السكر فى الارتفاع ؟

10- هل يوجد فى مصر مرض الطاعون ؟

11- هل انتهت ازمة المياة المخلوطة بالتيفود ؟

كفاية كده و لا نكمل ؟ اللى عنده اجابة او سئلة يبعت و يرد و نحن فى الانتظار

سلام بقى يا شعب الله المحتار

لحد الضهر

كل عام وانتم بخير
رمضان على الابواب يا رجاله و يا شباب و يا بنات و يا ستات و يا عيال كمان و بمناسبة العيال بقى قررت اكتب فى موضوع مهم و اخترتله اسم يحتوى على سؤال علشان تتفاعلوا معايا و تعلقوا عليه اما العنوان فهو ( فاكر رمضان و انت لسه عيل كان عامل ازاى ) تعالوا نحكى
رمضان زمان و ده من حوالى 20 او 21 سنة كان بيجى فى الصيف يعنى زى رمضان بتاع السنة دى حر و عطش و تبقى همدان و عاوز تنام . حاسب حاسب !!!!!!!!! انا مش بتكلم عنك او عنى ( احنا كنا بنصوم لحد الظهر ) انا بتكلم عن الكبار وقتها ابويا الله يرحمه و اصحابه و طقوس الجوع و العطش بتاعهتم تيجوا نحكى :
ابويا الله يرحمه كان ضابط فى القوات المسلحة بس رتبة يعنى حلوة و كان شغله فى المنطقة المركزية فى منطقة القبة و منشية البكرى المهم كان يرجع البيت حوالى الساعة ظهرا ودا عز الحر يا معلمين طبعا يعنى الراجل الله يرحمه كان بيرجع وشه اكثر حمرا من البطيخة او البطيختين اللى شايلهم العسكرى السواق ( بالمناسبة العساكر دى كنت بشوف فى وجوهم شحوب الموت او المرض العضال طوال رمضان ربنا يكون فى عونهم ) المهم الحج الله يرحمه او ما يدخل البيت يطلق زفرة الخلاص من الحر و العودة الى جو البيت المنعش المعبأ برائحة اكل ست الكل امى و معاها المساعدتان الاختين الحلوين ( طبعا كانت بتبقى فرصة للتدريب بالنسبة ليهم قصدى لهن علشان الجماعة بتوع التصحيح اللغوى وطبعا كل واحدة تفتكس نوع جديد من الاكل و المساكين ابويا و اخويا الكبير وامى هما اللى بيبقوا فئران التجارب لأنى انا و اخويا التوأم كان الصيام بالنسبة لينا لحد الظهر على ان نصحى قبل الظهر بربع ساعة )
بعد ما يسلم علينا و يدخل المطبخ لتفقد الحالة الطبخية و دا طبعا من اثر الجوع و يفتح الثلاجة يبص على ازايز الميه المشبرة و يقول اللهم انى صائم و بعدين يدخل ياخد دش بارد و يطلع يقعد يقرأ القرأن لحد اذان العصر و طبعا كل شوية يقوم يعمل الجولة التفقدية اللى قلتلكم عليها فى المطبخ ويقوم يطمأن ان البطيخ فى الثلاجة و المانجة و العنب و يسأل اختى الكبيرة ايه اخبار الكنافة و البسبوسة اه البسبوسة لانه كان ما بيحبش القطايف و بعد كده يسأل الصغيرة عملتى الخشاف ؟؟ حطييتى قراصيا كتير ؟ طيب بعتوا حد يجيب تمر هندى و سوبيا و هكذا السؤال عن كافة انواع الطعام الى ان يؤذن للعصر فينتهى التحقيق مع كتيبة العمل المطبخى و لكن مهلا دا مجرد فاصل لحد العودة من المسجد.
بعد ىعودة الحج رحمه الله من المسجد يستعد للنوم و لكن قبل النوم تصدر تعليمات لكتيبة الرجال ( اللى هما اخويا الكبير و العبد لله و توأمه )الكبير ياخد العربية و يروح باب الشعرية يجيب طرشى و تمر هندى و سوبيا مع التشديد على اسامى محلات البيع اما انا و الغلبان اخويا فعلينا شراء العيش و الليمون و لوازم السلطة و ما يستجد طبقا لتعليمات قائد المطبخ ( امى الحبيبة ) و طبعا السلطة دى كانت شئ مقدس لا يقوم به الا القائد الاعلى ( بابا ) وكانت مهمتى انى اصحيه قبل المغرب بساعة الا ربع .
المهم تخلص كل الاعمال التجهيزية للمعركة و تبدأ مرحلة التحضير و دى كانت مهمة اختى الصغيرة و بمساعدتى المثمرة انا و توأمى طبعا اترك لكم المجال لتصور مائدة لسبع اشخاص كل واحد قدامه 3 اكواب مشروبات بخلاف البيبيسى و الماء و كمان اصوات اشباك اطباق الاكل مع الحلل و الصوانى فى المطبخ و ذكريات ابويا عن طبق السلطة اللى عمله لزملاؤه و جنوده يوم نصر اكتوبر العظيم ( مش عارف جابوا خضار منين يوم الحرب ؟؟؟؟؟؟؟ ماعلينا الله يرحم الجميع ) طبعا كل ده بالاضافة الى صوت السيخ محمد رفعت فى الاذاعة و صوت التليفزيون و صوت اصحاب اخويا الكبير فى الشارع و هما بيستعدوا لمبارة فاصلة فى الدورة الرمضانية باليل و كأنها مبارة مصر و ايطاليا فى نهائى كأس العالم و طبعا انا و تزأمى الحبيب بنسرق السمع علشان نقول لبابا ( طبعا بعد الفطار ) اننا عاوزين نشاهد امجاد اخونا الكبير الكروية ) و طبعا اخويا يقول (هو انا هاركز معاهم ولا مع الماتش ) على فكرة كان بيخسر على طول و بعد كل ماتش يتخانق هو اصحابه و يتراشقوا بالكلام و يرجعوا يتصلحوا و يقولوا الماتش الجاى ان شاء الله هنكسب و هكذا ........
المشهد قبل الاخير

الاب ينظر الى الراديو و لسان حال يقول : ما تخلص بقى يا شيخ رفعت
الام يظهر عليها الاعياء من اثار معركة المطبخ الجديدة
الاخ الاكبر مش مهم الاكل المهم اشرب ميه و اخلص بسرعة علشان الحق اشرب سيجارة و لا اتنين فى الشارع قبل ما الحج ينزل يصلى
الاخت الكبرى منتظرة نخلص كل علشان تجيب اطباق الحلو و باب يقولها عفارم تسلم ايدك يا عسل
الاخت الصغرى شايلة هم لم بقايا المعركة ( السفرة ) و غسيل الاطباق
انا و توأمى : ههههههه مش فارقة معانا اصلنا لسه متغديين و نأنأنا شويه من المطبخ و احنا بنتفرج على عمو فؤاد ( كان بيجى قبل الفطار )
المشهد الاخير

مدفع الافطااااااااااااااااااااااااار اضرب
اذان المغرب و بعده اذاعة القرأن الكريم تتمنى لكم صوما مقبولا و افطارا شهيا
الكل يشرب كثيرا و يكاد لا يأكل و الام تنهرهم ( بطنكم هاتوجعكم ماتملوش بطنكم ميه كلوا امال كل ده هايترمى ولا ايه ؟ )
الاب يأكل قليل جدا كالعادة و يقول الحمد لله فننظر اليه بدهشة بلهاء ( امال ايه كمية الطعام اللى كنت قبل الفطار بتطالب بيها دى )
الاخ الكبير ياسبق الزمن لانجاز مهمة الافطار و بعدها يطلق تنهيده و يقول الحمد لله الحق بقى انزل اصلى المغرب ( ههههههه ابقى ادعيلنا يا شيخ ) تقولها اختى بنبرة خبث مما يستفذ الاخ الاكبر لانها فاهمة ان النزول مش للصلاة و لكن للسيجارة و تكاد تقع المشاجرة وسط ضحكات امى و الاخت الاخرى و تظاهر ابى بأنه مش فاهم
الاخت الكبرى تهب واقفة قائلة بحماس منقطع النظير ( اقوم اجيبلكم الحلو ) فيرد الجميع لا شكرا مش قادرين ناكل حاجة وهنا يلاحظ عليها ملامح لم اراها فى حياتى الا على وجه اختى و وجه محمد عبد المنصف حارس مرمى الزمالك يو ماتش السته واحد الشهير .
الاخت الصغرى يالا كله يقوم انا عاوزة اخلص السفرة و غسيل الاطباق قبل فوازير شريهان و الف ليلة و ليلة
بابا يصلى المغرب فى البيت و يستعد للنزول الى صلاة التراويح و بعدها قعدة القهوة مع عمو سعيد و كمال و صلاح و اشرف الرخم ( هبقى احكيلكم قصة عمو اشرف الرخم دى بعدين )
الاخ الاكبر يعود من صلاة المغرب ( اللى بالى بالك ) و رائحة السجاير تفوح منه بالرغم من لبانة النعاع و انخراطه فى الاكل من جديد بعد شعوره بالجوع ( طبعا كده عرفنا ليه ان بيخسروا ماتشات الكرة ) و البنتين بيتفرجوا على التليفزيون و ماما نامت ترتاح شوية اما انا و توأمى الحبيب فنستعد للنزول وراء اخى للفرجة على الماتش المعروفة نتيجته مسبقا بس قبل ما ننزل نتعشى الاول لحد ميعاد السحور طبعا علشان هنصوم بكره طبعا

لحد الضهر

حملة حذف الفيديوهات المسيئة للاسلام من على يوتيوب

انا بجد مكنتش ناوى اكتب اى حاجة النهارده و كنت لسه بدور على حاجة اكتبلكم عنها لانى بقالى كتير مكتبتش ولا جبتلكم مواضيع جديدة و لكن انا بالصدفة البحتة لاقيت نفسى وانا على اليوتيوب لاقيت فيديو تحت مسمى ( مايكل جاكسون يرتل القرأن ) دفعنى الفضول علشان اشوف الموضوع و ياريتنى ما فتحته هذا الفيديو اللعين الوقح لانه من وجهة نظرى الشخصية يفوق او يتساوى مع تلك الرسوم القذرة للرسام الدنماركى الحقير و ما ترتب عليها من ردود فعل عالمية و حسبى الله ونعم الوكيل فى اللى عمله .
المهم يعجز لسانى عن وصف ما جاء فى الكليب الحقير الدنيئ و للعلم انا من اكتر الناس اللى ضد التعصب الدينى و الفتن و لكن انا مش خنزير لان اللى يشوف الفيديو ده و يسكت يبقى خنزير ليس له غيرة على دينه و لا على كلام ربه جل وعلى .
طبعا مستحيل نعرف مين اللى عمل الكليب اللعين ده بس نقدر نعمل حاجة تانية اننا كلنا نشارك فى حملة على الانترنت و نوجه اللوم لموقع يوتيوب على نشره لهذا الفيديو ونوضح لهم مدى الاساءة و الضرر اللى اصابنا من مشاهدة الكليب ده .
انا عملت جروب على الفيس بوك للموضوع ده و عاوزكم كلكم تشاركوا معايا فى نصرة الاسلام و قرأننا الكريم و كمان بادعوا اى مسيحى متعصب انه يشارك معانا فى ادانة مثل هذه التصرفات القذرة اللى بتفتح ابواب الخلاف و الحقد والكراهية .
يا جماعة اوعوا تسكتوا او تطنشوا لان الموضوع ده كبير و لازم العالم و الدنيا كلها تعرف ان الاسلام لسه فيه رجالة بيدافعوا عنه من عبث الجهلة و البلاهاء .
طبعا انا اسف لوضع رابط الفيديو على مسماه ولكن ده علشان الناس كلها تدخل و تشارك وتطلب بحذف هذا الكليب القذر معلش اعذرونى بس دا القران القران القران .

الحملة على الفيس بوك

خبر لابد من نشره

النهارده موقع مصراوى نشر موضوع عن فيديو لو اى حد فيكم شافه مش هيصدق ان فى بنى ادم فى الدنيا ممكن يعمل كده و الموضوع باختصار عبارة فيديو يظهر مجموعة من الناس تقوم بعملية انتقام من شخص لسبب لا يعلمه الا الله و ان كانت فى اجتهاد من كاتب الموضوع حول تفسير السبب .
المهم مش هاطول عليكم الفيديو ده انا كنت شفته من حوالى شهرين وفعلا ماحبتش اكمله و كان فى استطاعتى نشره ولكن المناظر اللى فيه بشعة و قليلة الادب اخر حاجة دا غير ان الحديث لا رقى حتى للغة المجرمين فقلت انشر لكم الموضوع بتاع مصراوى و التفريغ اللى هما عاملينه .
الموضوع ده لازم وزارة الداخلية كلها تتحرك علشان تجيب الناس دى زى ما جابت البنت بتاعة الالكتريك شوك ( اللى كانت بتقول ان ابوها واحد من باشوات الداخلية ) والا هايصبح الموضوع ده عرف جارى كل واحد يزعل حد الحد ده يروح يلم شوية صيع و بلطجيه و يتحفونا بكليب جديد .


و دلوقتى اسيبكم مع نص الخبر من مصراوى

مصراوي - خاص - حصل موقع مصراوي على كليب جديد يتضمن مشاهد بشعة تعكس الانتشار الكبير للعنف في المجتمع المصري في الاونة الاخيرة.

ويظهر في الكليب الجديد الذي يتداوله كثير من المصريين على هواتفهم المحمولة - كنوع من اللقطات الغريبة والطريفة - مجموعة من الرجال يقومون بطعن وجرح شاب في العشرينات من العمر بالاسلحة البيضاء وهو عارى.

ويبدو من الكليب ان هؤلاء الرجال - عددهم بين الخمسة والستة - يحتجزون هذا الشاب العاري - وينادونه في الكليب باسم "احمد" في احدى الشقق، ويقوم عدد منهم بتصويره بكاميرات الهواتف المحمولة بينما يقوم الاخرون بضربه وطعنه بالسكاكين.

ويبدأ الكليب بمجموعة من الرجال يشتمون هذا الشاب ويأمرونه بالخروج من دورة مياه الشقة التي يبدو انهم كانوا قد اجبروه على البقاء فيها بينما تغطي الدماء جميع اجزاء جسده الذي يظهر وقد امتليء بعشرات الجروح فيما يبدو انه نتيجة جولة سابقة من الضرب والاصابات بالاسلحة البيضاء.

ويقول احدهم "اطلع ياد يا بن الـ ... تعالى اقف جنب الانتريه الحلو ده"

ويخرج الشاب "احمد" من دورة المياه وهو يمشي بصعوبة بسبب الاصابات الكثيرة التي لحقت به من قبل، ويقوم هؤلاء الرجال بتوجيه اقذع الشتائم والسباب له، ويقولون له "عملت راجل يا بن ...".

ويناشدهم احمد ألا يصيبوه مرة اخرى ويقول لهم "طيب ما تعورونيش تاني"

فيرد أحدهم موجها حديثه لأحمد "محدش هايعورك تاني .. محدش هايعورك تاني". ، ويقول لزملائه "محدش يعوروا تاني يا جدعان لغاية ما يعترف".

ويقول أخر لأحمد "هو انت لسه اتعورت يا بن ....".

ثم يأمرونه بعرض جسده امامهم وامام من يصورونه بكاميرات الهواتف.

وبعدها يأمرونه بالوقوف امام الكاميرا وهم يوجهون له الصفعات والركلات، والشاب يطلب منهم الا يطعنوه بالاسلحة مرة اخرى.

ويقول شخص اخر للشاب احمد "محدش كلمك يا بن .. ده احنا حايشينه عنك يا بن ...".

ثم يتعمد بعض هؤلاء الرجال اصابة الشاب بالاسلحة البيضاء في رقبته ووجه وجسده عدة مرات بشكل بشع، واظهار الجروح امام كاميرا الهاتف المحمول.

ويقول احد الاشخاص الذين يقومون بتصوير الشاب "لف كده يا احمد لف كده ، ويمسك وجه الشاب بيده ليظهر الجروح الكثيرة التي اصيب بها والدماء تنزف منها".

ثم يأمر بعض هؤلاء الرجال احمد بالقيام بأفعال جنسية معهم تحمل اذلالا واهانة له ويتعمدون تصويره بالكاميرات.

ويبدو الشاب في الكليب وكأنه لا يشعر بهذه الاصابات حيث يبدو وكأنه تحت تأثير المخدرات لكنه يطيع اوامرهم في فزع واضح ويحاول استجداء عطفهم دون فائدة.

وبصعوبة يمكن لمشاهد الكليب تمييز بعض الجمل حيث تتداخل اصوات هؤلاء الرجال الذين يتكلمون بلهجة مصرية واضحة، لكن سيل الشتائم لا ينقطع منذ بداية الكليب وحتى نهايته.

ويقول احدهم للشاب بصوت واضح " الخمسمية جنيه والجاكت يجو يا بن ....".

ويقول احدهم لأحمد عملت ايه بالفلوس يا بن ...." ، فيرد احمد "جبت بيهم برشام".

ويتواصل الضرب والطعن في احمد إلى ان يحاول احد هؤلاء الرجال التدخل لدى زملائه لايقاف ضرب احمد فيقول "ايه يا جدعان، بس بقى كفاية كده يا جدعان عشان خاطر ربنا".

فيرد شخص اخر - يبدو انه صاحب الجاكت والـ 500 جنيه "ونعم بالله".

فيقول الشخص الاول لأحمد "يلا ياد امشي ياه".

فيقول صاحب الجاكت "لا لا لأ يمشي لأ، يمشي لأ".

فيرد الشخص الاول "يا عم فلوسك والجاكت هايجولك هو يعني هايروح فين"

فيرد عليه "على الطلاق ما هيمشي من هنا الا لما الخمسمية جنيه والجاكت يجو".

فيقول الاول لأحمد "يلا ياد خش الحمام تاني ياد"

وتظهر وجوه هؤلاء الرجال وهذا الشاب في الكليب بوضوح، حيث لا يبدو انهم مهتمون بإخفاء وجوههم على الاطلاق، بل على العكس تبدو تصرفاتهم في الكليب وكأنهم يباهون بما يفعلونه بالشاب وكأنه يرسلون رسالة إلى اخرين، او كأنهم يفتخرون بأنهم هم من فعل هذا بذلك الشاب.

وبعد ان ينتهي هؤلاء الرجال من الهدف الذي اخرجوا "احمد" من دورة المياه لأجله - وهو على ما يبدو تصويره اثناء اصابته مجددا بالسكاكين واجباره على القيام بأفعال جنسية معهم - يأمرونه بالعودة مرة اخرى إلى دورة المياه، حيث يقول احدهم "ادخل اقعد في الحمام تاني يا بن ...".

وينتهي الكليب حين يتبعه احد هؤلاء الرجال - يرتدي سروالا قصيرا (شورت) - على باب دورة المياه ويواصل استجوابه ويسأله "الخمسمية جنيه والجاكت فين"؟

ويقوم كثير من المصريين - وخاصة الشباب - بتداول هذا الكليب على هواتفهم المحمولة تحت اسم كليب "المرشد".

وقال بعض المواطنين لمصراوي ان هذ الشاب الذي يظهر في الكليب هو شخص يعمل مرشدا للشرطة وان هؤلاء الرجال الذين يحتجزونه هم تجار مخدرات سبق وان ابلغ عنهم هذا الشاب الشرطة، وانهم يعاقبونه على الابلاغ عنهم.

وقالوا ان هذه الاحداث وقعت في منطقة تسمى "حسن محمد" بين شارعي الهرم وفيصل وتابعة لقسم الهرم.

بينما قال سائق تاكسي لمصراوي ان هذا الكليب منتشر بين اصدقائه وشاهده عدة مرات مع كثيرين منهم.

وقدم السائق راوية اخرى لهذا الكليب، حيث أكد ان الشاب الذي يظهر في الكليب هو شخص اعتدى على شقيقة او زوجة احد هؤلاء الرجال، وانهم يقومون بمعاقبته انتقاما لشرف زميلهم، وان هذه الاحداث وقعت في منطقة الطاليبة القريبة ايضا من شارع الهرم والتابعة لقسم شرطة العمرانية.

لكن المشاهدة المتكررة لهذا الكليب تظهر عدم منطقية هذان التفسيران حيث يطالب هؤلاء الرجال الشاب بوضوح واكثر من مرة بإعادة 500 جنيه وجاكت يبدو انه اخذه من احدهم، ولم يقل احدهم شيئا عن تجارة مخدرات او الدفاع عن الشرف.

ويعتذر موقع مصراوي عن عدم تمكنه من عرض هذا الكليب - الذي يحتفظ بنسخة منه - على زواره نظرا لما يحتويه من مشاهد بشعة وغير محتملة فضلا عن الكم الهائل من الالفاظ البذيئة التي يتضمنها.

ويدعو مصراوي اجهزة الامن للبحث عن الاشخاص الذين يظهرون في هذا الكليب والكشف عن هويتهم والاسباب التي دفعتهم لارتكاب هذه الجريمة وتقديمهم للمحاكمة لمعاقبتهم، والبحث كذلك عن هذا الشاب ومعرفة مصيره وهل توفي جراء هذه الاصابات العديدة ام مازال على قيد الحياة.

الاخلاق مش بس مطلوبة فى السينما

تابعت مبارة الاهلى و بترول اسيوط النهارده و اكيد كتير منكم تابعها مش دى القضية و لكن القضية هى سلوك عمله لاعب نادى بترول اسيوط الافريقى ( هنرى اكيلى ) بعد احرازه الهدف الثانى لفريقه بترول اسيوط و الواقعة القذرة تتلخص فى قيام هذا اللاعب خلع شورته امام الجماهير وللاسف التقطتها عدسات مصورى التليفزيون يعنى كمان الناس اللى فى بيوتهم شافوا التصرف القذر ده .
المهم حكم المبارة تفضل مشكورا واكتفى بانذار اللاعب طيب على افتراض ان ده حق الحكم و حق المبارة و حق الكرة وقانونها :
طيب فين حقنا احنا بقى انا وانت اختك واختى و امك و امى ابنك و بنتك ؟؟؟؟ الظاهر كده يا جماعة اننا محتاجين حاجات كتير علشان الاخلاق تبقى كويسة ومش كفاية علينا السينما و الفيديو كليب و حركات الناس الدهماء و الغوغاء فى الشوارع اللى كان ناقص طمان يطلع لنا لاعيب زى المختل بتاع بترول اسيوط علشان يزود الطين بلة .
بصوا انا لو قعدت اكتب فى الموضوع ده مش هاخلص علشان قلة الادب بقت شئ زايد عن الحد قوى اليومين دول بس انا هاسيب الصورة توريكم و مستنى ردكم انتم على الموضوع ده

ملحوظة
انا اسف جدا جدا جدا على اعادة عرض الفيديوولكن ده من باب المصداقبة

اهلا بكل صاحب رأى او كلمة او صورة

لما حطيت الاعلان اللى فى اعلى الصفحة ماكنش متوقع كمية الناس اللى هاترد على و تطلب انها تكون معانا و علشان كده احنرت انشر ايه ولمين و لكن الحمد لله استقر الرأى هانشرهم فى رسالة واحدة لحين الانتهاء من تغيير قالب المدونة علشان ندى للناس دى حقها كامل مش هاطول عليكم الموضوعات و اصحابها هيبقى قدامكم حالا بس فى حاجة
فى موضوع مكتوب فى الشريط الجانبى ده موضوع لدكتور سوسن و انا حاطيته فى الشريط الجانبى لانه ده هايبقى مكان كلمتها اللى هاتكتبها لينا بانتظام ( حاجة كده زى العمود الصحفى الدائم يعنى ) و بصراحة انا مجرد ما طلبت منها وافقت و طبعا الف الف شكرا لها ويكفى انكم تعرفوا انها عندها مدونتها الخاصة و مع ذلك وافقت انها تكتب معانا هنا فلها جزيل الشكر و الاحترام .
نرجع بقى للموضوعين اللى قلنا اننا هاننشرهم النهارده:
الموضوع الاول فيديو اهداء من الموهوب عصام عبد الحميد و الراجل ده يا جماعة انا بقول انه فعلا فنان ودماغه كبيرة مش علشان الفيديو بتاعنا ده ولكن يكفى ان تدخل وتشوف القناة بتاعته على اليوتيوب و هاتعرف قد ايه هو خياله جميل و السينس عنده عالى .

وده الفيديو اللى عم عصام اهداه لينا

طبعا الف شكر يا عم عصام
_________________________________________________________________________


اما الموضوع التانى بقى فده موضوع جميل انا عن نفسى حاسه قوى لانه فيه محاولة جميلة من راجل صغير جميل اسمه احمد ماجد الراجل ده لفت نظرى من اول مابعتلى رسالة تعارف لقيت فيها كلام جميل وعنوانها الذ بكتير ان مش هاطول برده عليكم وهاوريكم الرسالة بتاعته ده طبعا بعد اذن ابو حميد

c.v

بعد التحية

انا احــــب الكتابة وفـــى أى موضوع

فى الرياضة لانى كنت لاعب كرة وأشجع نادى الزمالك

فى الفــــــن لانى شــــــاب ويجـب متــــــابعة الحـــــياة

فى الســـــــياســــــة لانى مجــبـــــر ان افهم بــــهــــــا

دا كان نص رسالة احمد للعبد لله ولما قلتله يالا اكتب على طول و ابعتلى بسرعة بعتلى الموضوع اللى هاعرضة عليكم و اللى حسيت من خلاله قد ايه الراجل ده نفسه يعبر عن حزنه وضيقه وحبه و ولائه بكلمات كيبورده ( مش قلمه ) و برده هانشرها زى ما بعتها حتى من غير تصحيح لغلطاته الاملائية علشان تعيشوا نف اللى عيشته انا مع المقالة دى رغم انى اهلاوى

دا اللى كتبه استاذ احمد ماجد

الزمالك الى اين ؟؟؟؟

سؤال يطرحة كل جمهور نادى الزمالك هل ممكن ان يكون الدورى القادم بدون نادى الزمالك !!!! هل هؤلاء هم لعيبة نادى كبير هل هذا هو النادى الذى لعب له أعظم واحرف لعيبة على مر العصور اليس كان نشيد هذا النادى مدرسة الفن و الهندسه ...لم يعد هناك فن فالنادى مثل المريض الذى لا نعلم متى ستخروج روحه...كل هذا واللعيبة (ولا فى دماغهم ) هذا يهرج وهذا لا يحضر التدريب وأخر يماطل فى التجديد وأخر نازل الملعب تأه اليس هم السبب الحقيقى لعيبى نادى الزمالك هم الوحيدين فى مصر الذين لا يشاهدون الحقيقة..فالادارة تغيرت والاجهزة الفنية تلاحقت والنقاد لم يعد لديهم صبر والجمهور يتمنى أى شيىء يريد تغير فالجمهور لم يعد ينتظر نتيجة مباراة ولكنة ينتظر اداء يريد روح جماعية يريد أخلاص عندما أرى كل من يتكلم عن هذا النادى أبكى دما على هؤلاء اللعيبة ما بهم هل هم من وطن اخر لانعرفة هل هم يلعبون الكرة باسلوب جديد لا نعرفه الا يشاهدون حرقة وحزن الكبار الذين لو باستطاعتهم نزول الملعب مرة اخرى و(أكل النجيلة) لفعلوها البقاء لله على هؤلاء اللعيبة الفاقدين لكل شيىء عن الانسانية .....متى يفقون من غيبوباتهم متى..كلمتى الاخيرة لهم

الكبار قد يمرضون ولكن لا يموتون ابدا فعليكم اما ان تكونوا كبار او ان لاتكون شيىء

انا اعلم ان اكثر الاوقات ظلمه هى التى قبل طلوع الفجر ...فهى بنا جميعا ان نصحو ونفيق نادى الزمالك من غفلتة ...... ل

ونحن جماهير هذا النادى العريق وراءه بهؤلاء او بيغيره

شكرا جدا يا احمد ومستنى منك اكتر من كده

دول اول مشاركات من الناس اللى بيقروا مدونتى مع العلم اننا بقى لينا مراسل فى جامعة القاهرة بيحضر لنا موضوع جامد جدا و لسه عاوزين مراسلين وناس تكون عاوزة تكون معانا و مننا و مستنى منهم كتير و اوعد اللى ما نشرت موضوعاته انى هانشرها قريب ان شاء الله .

مصيبة جديدة فيلم واحد صفر

طبعا بعد دخولنا حملة مقاطعة السينما الهابطة تابعت الجديد فى السينما المصرية ولا قيت فى فيلم جديد اسمه واحد صفر الفيلم ده فى عدة كوارث من وجهة نظرى الشخصية اذكر منها :
الاعلان بتاع الفيلم و انا حاطط الفيديو فى اخر الموضوع علشان الكل يشوفه ويعرف انى مش بقول كلام ظلم ومش باظلم حد : الاعلان يا اخونا بيحتوى على مشهد اقل ما يصف بانه قليل الادب للممثلة انتصار داخل الاتوبيس - و الممثلة زينة تتفوه بلفظ جرى العرف فى مصر على انه لا ينطق الا من انثى اتناء المعاشرة الجنسية _ الممثلة نيللى كريم تتلفظ بلفظ دنيئ جدا معناه الاثارة .
ده غير الملابس المثيرة للممثلة زينة وحركاتها الخليعة وهى تغنى لمصر و تحديدا لمشجعى الكرة .
الغريب فى الامر ان الفيلم من انتاج الشركة المصرية لمدينة الانتاج الاعلامى وليس من انتاج منتج من منتجى الافلام الرخيصة الذين يسعون لجنى الاموال لا اكثر .
السؤال هنا : هل يستطيع مواطن مصرى ان يذهب الى السينما لمشاهدة هذا الفيلم و معه زوجته وابنائه او اخته او حتى صديقته ؟
يا جماعة اتقوا الله فى شباب البلد و بناتها قبل ما نشوف جرائم تحرش جديدة و اغتصاب بنات و اغتصاب محارم و نرجع نقول يا ريت اللى جرى ماكان.

مش كده ولا ايه ؟

مدونة مش كده ولا ايه تنضم الى حملة مقاطعة سينما التعرى

تعلن مدونة مش كده ولا ايه انضمامها الى حملة مقاطعة سينما التعرى و الشذوذ الجنسى و الاسفاف .
وهدف هذه الحملة هو الضغط على المنتجين و المخرجين و الممثلين الذين يشوهون السينما المصرية بعرض افلام تحوى كل ما يخطر على البال من المشاهد و الحوارات القذرة المبتذلة على الجماهير دون مرعاة لمشاعرهم و حيائهم و كل ذلك يتم تحت مسمى الفن الحر .الامر الذى يؤدى الى انتشار جرائم عديدة بسبب ما تسببه هذه النوعية القذرة من الافلام من حالات اثارة جنسية لدى الشباب و المرهقين و كذلك محاولة الفتيات تقليد بطلات تلك الافلام فى ظاهرة تعد غريبة على مجتمعنا المصرى وان لم تصدقنى راجع حوادث التحرش فى مناطق وسط البلد تجد ان معظم مرتكبيها من المراهقين الذين خرجوا لتوهم من السينمات بعد مشاهدة تلك الافلام الدنيئة .
ولقد قام بعض السباب الواعى المصرية بانشاء جروب خاص على موقع الفيس بوك للدعوة لمقاطعة هذه الافلام الرخيصة وانا اعلن بكل فخر انضمامى لهذا الجروب الحر و كذلك ادعوك عزيزى الزائر ان تكون معنا من اجل سينما نظيفة تليق بك و باسرتك رجالا و اطفالا ونساء .

للانضمام اضغط على شعار الحملة فى الشريط الجانبى

مش بس كده دى الجرايد القومية كمان عرفت باخبار الحملة لدرجة ان جريدة الجمهورية واسع الانتشار نشرت تقرير مفصل عن الحملة و عن مخاوف منتجوا السينما من اثرها عليهم واليكم نص التقرير

دعوة مخيفة للشباب علي "الفيس بوك" تهديد قاتل لصناعة السينما رفعوا شعار عودة الحياء بمقاطعة أفلام الشذوذ والعري !

حازم خليفة

علي غرار دعوة 6 أبريل التي انتشرت علي شبكة النت وكان لها كبير الأثر بدأ مجموعة من شبابنا حملة مقاطعة الفن الهابط تحت شعار "مش داخل السينما".. وبدأت الحركة في الانتشار وحشد الجموع.. وهي كما جاء علي لسان أحد القائمين عليها انها عبارة عن مقاطعة تامة للسينمات ودور العرض. لماذا؟ قالوا: من أجل اننا دائمو الشكوي من القذارات التي نشاهدها في الأفلام وأصبح الموضوع يتجه من سييء لأسوأ وفي نفس الوقت نشتكي من الوضع الغريب الذي أعطي ممثل هايف مليون جنيه وآلاف الخريجين من الطب والهندسة وغيرهم مرتباتهم ملاليم.. هذا إذا وجدوا فرصة العمل من الأساس.. وكلما نتكلم نلوم علي الحكومة كالعادة.. لكن المسئولية الأكبر علينا إحنا الشباب!! فالموضوع عرض وطلب.. المنتجون لا يصنعون الأفلام بالشكل الذي نختاره احنا ولأننا لا نعترض ونذهب للسينمات وندفع "ساقوا فيها" ولو فكرنا في الموضوع سنجد اهانة كبيرة جدا ومن أجل ذلك لابد من تغيير الوضع.. ونقول "لا لا لا للاباحية" و"لا للفن الهابط" و"لا للهيافة"!! خلينا نبقي عمليين ونحسبها لو افترضنا متوسط دخول السينما للواحد منا مرة واحدة شهريا ندفع فيها 02 جنيها فلو وصلنا ل100 ألف عضو بالحركة لمقاطعة السينما سيكون الناتج خسارة شهرية 2 مليون جنيه!! وعلي الأقل نكون وصلنا صوتنا الذي ينادي باحترام عقولنا وآدميتنا بفن محترم يحترم عقولنا وقيمنا وديننا. ويضيف الشباب.. فلابد أن نكون ايجابين ولا نقول "هيه جت عليا أنا".. مادام هناك أناس كثيرون يذهبون للسينما.. لكن المهم كل واحد يعمل اللي عليه.. وأهم من المقاطعة والانضمام اليها أن تقاطع وانت رافض من داخلك يعني لازم تكون فعلا مش عايز الأفلام دي.. وعايز بدلا منها فن محترم وهادف..! هذا ما جاء "دعوة المقاطعة" التي تهدد صناعة السينما في مقتل.. بعض المشاهد * أحمد حاتم أحد المسئولين بشركة الباتروس للسينما تساءل: هل كل الأفلام الموجودة علي الساحة بها خلاعة أو مشاهد ساخنة أو قبلات؟ فلا اعتقد ان أي أفلام من التي انتجناها مثل أفلام أحمد حلمي والمش مهندس حسن وغيرها كثير.. وهناك أربعة أفلام ليس كلها عن الجنس وفيها قضايا مهمة تناقش.. فالمهم أن يناقش الفيلم قضية ما ولا يخلو الفيلم من مشاهد تساعد علي خدمة القضية ونقول قول الدين في مثل هذه المواقف "الحلال بين والحرام بين".. مادام أفيش الفيلم المعروض يبشر بمناظر جنسية لا تعجب البعض ما هو الدافع وراء مشاهدته فمن الممكن مقاطعته إلا أن يكون الدافع داخلياً من داخل الشخص ذاته. أما شركتنا فهي تضع لنفسها عدة قضايا تتناولها في أفلامها ومن حق الجميع مشاهدة الأفلام واعلاناتها ومقاطعة ما يريد.. فهناك أفلام هادفة وبها بعض المشاهد ولا يخفي ان الأزمة الاقتصادية العالمية لم تترك أحداً ينجو منها فقد دمرت الناس كلها.. وهناك أفلام جاهزة للعرض أراهن علي أنها قد تحمل مشكلات ومنها فيلم هيفاء وهبي دكان شحاتة فشركات الانتاج في مصر أخذت علي عاتقها النهوض بمستوي السينما وسنلمس حالة صعود حقيقية في الأيام القادم. نسبة ضئيلة * المخرج السينمائي اسماعيل مراد يري: ان الافلام الهابطة بتتعرف وتهبط طبيعيا واعتقد ان الأفلام التي بها مشاهد لا تخدم قضية ما يناقشها الفيلم. هي استفزاز وإثارة للغرائز وأقول لمن يعمل علي هذه الدعوة القاتلة لم لا تعمل مقاطعة للتوكيلات التجارية اليهودية بمصر لنصرة غزة فدخول السينما اختياري وليس فرض عين علي كل انسان.. فهو يرتدي ملابسه ويركب مواصلات للوصول لدار العرض وايضا يدفع المال من أجل المشاهدة فالمقاطعة مقاطعة ذاتية داخلية في كل شخص ونابعة من رقابة الشخص ذاته. ومن ناحية أخري عدد السكان بالدولة ما يقرب من 80 مليون نسمة و30% أو 40% منهم شباب ومراهقون وهم من تغازلهم السينما.. فالجمهور تغير والنوعية ليست كما كانت من قبل.. فلو أن نسبة منهم استجابت للدعوة فلن يكون لها التأثير الكبير أو المخيف علي السينما.. فستكون نسبتها لا تذكر ومن الممكن أن تكون هذه النوعية لا تدخل السينما من الأساس. * أما الناقد الكبير عبدالغني داود فيري: ان بعض الممثلين الجدد هم من يقضون علي صناعة السينما.. وضرب مثلا بحفلة جامعة المنصورة العريقة واستضافتها لمغن ليس له صلة بالطرب وكانت النتيجة وقوع فضائح في الاستاد وتحرش وغيرها بالاضافة لعشرات الحالات المصابة فهل هذا نموذج مشرف؟! أشار داود إلي أن ما يحدث باختصار أن هناك سينما هابطة لا تخفي وجهها وهي صاحبة القصص الرخيصة.. وتشتهر ببعض الأسماء مثل محمد هنيدي ومحمد سعد وأشرف عبدالباقي وأحمد رزق وغيرهم وهناك أيضا سينما نظيفة لانها خالية من الأحضان والقبلات وايضا هناك نماذج مثل أفلام خالد يوسف "هي فوضي" و"حين ميسرة" تتكلم وتوصف الصورة القبيحة لمصر.. وهو في الأساس يقلد النموذج الأمريكي يكشف عيوب مجتمعه لكن هذه المجتمعات لها ثقافات تختلف عن مصر فلها تقاليدها وعاداتها ومواريثها الغربية فهم يتحججون بحرية التعبير وانهم يكشفون مساويء وسلبيات المجتمع!! فهل هم يكشفون بحق أم يدعون الشجاعة والجرأة في النقض وفي حرية التعبير. لكن الحقيقة انهم يقدمون لوحات سلبية دون تحليل أو دراسة لهذا الواقع.. ويقول انه شجاع وجريء ويقدم الصورة السلبية من زنا محارم والمخدرات وكله علي المكشوف. وهو بذلك سينمائي علي المستوي الغربي ولكن الذي يحدث انه يقدم دون تحليل أو دراسة ودون تعقل لمستقبل هذه الأمة فالمشاهد في النهاية يخرج بدون هدف مفيد أو مناقشة نفسه فيما يحدث فيما حوله من أسرار المناخ في مصر. كما أوضح داود ان السينما الهابطة لها جناحان الأول الرخيصة وهم الذين لا يقدمون إلا نوعاً رخيصاً من الاثارة.. والثاني أصحاب النظريات الذين يدعون الشجاعة الأدبية. كما حيا مثل هذه الحركات التي تطمئنا علي أن مصر مازال بها خير وانهم نقاط مضيئة في نفق مظلم وليس كل الشباب مسطح وتافه وان عنده وعياً وانتماء وخوفاً علي مستقبل بلاده. وأرجو أن ينضم اليهم كل الشباب من أجل أن ننتهي من مثل هذه الأفلام الهابطة.. فالفيلم الآن يتكلف حوالي ستة ملايين من الجنيهات في حين أن أيام الأبيض والأسود كان من الممكن أن تنتج فيلما في حدود عشرين ألف جنيه! نعم هناك اختلاف في الأسعار ولكن بالنظر في أجر الممثلين المرتفع والباهظ نجد ان كل واحد لا يجيد التمثيل يشترط أجره بالملايين وببشاعة من أجل تقديم لا شيء فيكون عدمه أفضل! فهذه الحركة مؤشر للمنتجين لإعادة التفكير والتمعن فيهن يقدمونه من قصص وأفكار ولن تنجح الحركة إلا باتحاد كل الشباب وامتناعهم عن المشاهدة لانهم الممول الوحيد ولكن أيضا نسلط الضوء علي أن يكون الامتناع بناء علي هدف فني ابداعي وليس متشدداً أو متخلفاً أو يقال ان السينما حرام مثلا!! أنا لست ضد اختراق الحقيقة ولكن ليس بغياب الوعي وتحويل جسد المرأة إلي سلعة.. يعني ان يلتزم المنتج بأسس الانتاج الفني أن تكون سينما واضحة متفتحة جريئة وشجاعة وممتعة في نفس الوقت وفي النهاية الوعي أهم من المتعة.. وان كان مشهد العري له دلالاته ويخدم القضية فلماذا لاولكن لا يكون لاثارة الغرائز والاعصاب وتنبش المواطن الخبيثة في الإنسان فمن الممكن عمل مشهد عري كامل بدون اثارة غرائز جنسية!! فالمشكلة هي مشكلة تناول.. ولا نقول ان يكون منطقهم أخلاقياً بحتاً.. ولكن المهم ان يكون في النهاية "فناً" وليس اثارة رخيصة أو افتعالاً.. ونري ان هناك أفلاماً ليس بها قبلات أو مشاهد جنسية ولكن مستواها هابط فلذلك يكون المبدأ "ابداعياً فنياً".. فالمجتمع له أخلاقه وثوابته التي يختلف بها عن أي مجتمع آخر غربي ويجب مراعاة ذلك!؟

كان هذا هو نص التقرير المنشور بجريدة الجمهورية بتاريخ الخميس 26 فبراير 2009 و الان اترك لك حرية التفكير فى الانضمام الى الجروب من عدمه .

وكل واحد حر فى رجولته و نخوته

التحقق من هوية لاعب الاسماعيلى

نجح فريق العمل فى كشف هوية لاعب لاسماعيلى الذى تم القبض عليه يوم الاحد 22/2/2009 هو و اخرين بمدينة الاسماعيلية و اللاعب هو احمد خلف و شقيقه محمد خلف .
نحن لا نعلق على الحياة الشخصية لاحد ولكن سيبقى دائما و ابدا الرياضيون هم القدوة الحسنة للصغار و الكبار . و اعتقد ان مسئولى القلعة الصفراء لابد ان يكون لهم وقفة مع مثل هذا اللاعب تماما مثلما فعل مسئولى القلعة الحمراء مع اللاعب عمرو سماكة حينما تأكدوا من تعاطيه المخدرات .

خبر عاجل بدون تعليق ( القبض على لاعب بالفريق الاول بنادى الاسماعيلى بشقة دعارة )

منقول عن العربية نت :

ألقت مباحث الآداب بمحافظة الإسماعيلية (شرق القاهرة) القبض على لاعب بالفريق الأول لنادي الإسماعيلي الشهير بالدراويش، وذلك مع احدى بنات الهوى داخل شقة لممارسة الدعارة.

وقال مصدر أمني لـ"العربية.نت" إن معلومات وصلت إلى مباحث الآداب عن احدى الشقق المخصصة للدعارة فتم وضعها تحت المراقبة وثبت أنها تدار بالفعل لهذا الأمر، وقد تم استئذان النيابة وقامت قوة من مباحث الآداب بمداهمة الشقة والقبض على لاعب كرة قدم بنادي الإسماعيلي وشقيقه، واثنين آخرين يعملان في أحد البنوك الأجنبية وبصحبتهم أربع فتيات.

وقال المصدر إن قوات الأمن التي دهمت شقة الدعارة بمنطقة "البلاج" لم تكن تتخيل أن تجد داخلها لاعب كرة قدم تعشقه جماهير الدراويش، خاصة أنه غير معروف عنه أن له علاقات نسائية.

وفي الوقت الذي تتحفظ فيه "العربية.نت" على ذكر اسم اللاعب، كانت أنباء ترددت عن أن لاعب الإسماعيلي يمر حالياً بظروف نفسية صعبة، خاصة بعد حديث حول الاستغناء عنه ضمن خمسة لاعبين من النادي نهاية هذا الموسم.

وكانت معلومات قد وردت إلى رئيس مباحث قسم أول المقدم محمد المناخلى عن وجود أربعة أشخاص في الشقة المراقبة ومعهم أربع فتيات، وتم استصدار إذن النيابة ومداهمة الشقة والقبض على المتهمين الأربعة وبصحبتهم الفتيات الأربع فى أوضاع مخلة، حيث تم تحرير المحضر 941/2009 جنح أول وتولت نيابة قسم أول الإسماعيلية التحقيق.

من هو هذا اللاعب الفلاتى ؟ اذا عرفت الحل اكتبلى مين هو عم الدنجوان فى التعليقات وعلى فكرة انا عارف مين هو

عن تفجيرات الحسين ياما قالوا

المكان بيتنا . الزمان بعد ماتش الاهلى و بتروجيت مش فاكر الساعة كام بالظبط بس هو كان يوم الاحد 22 فبراير 2009 .
خناقة بين و بين امى على التليفزيون هى عاوزة مسلسل القناة الاولى الارضية و انا عاوز دريم الفضائية . الخناقة بتزيد امى بتقولى انا سيبالك الماتش ( امى زملكاوية ) وانا بارد عليها لسه بدرى على المسلسل يا حاجة استنى عاوز اسمع تعقيب زيزو و مصطفى يونس على الماتش دا طبعا وانا دمى محروق لان بتروجيت خطف التعادل المستحق ايوه المستحق لان الاهلى جاب اهدافه ببركة حجاب الشيخ سحاب اما بتروجيت فسجل اهدافه ببركة الشيخ امير الحارس الكبير ....
ماعلينا طبعا المعركة انتهت بفوز الحاجة امى و فرضت سيطرتها على اوضتى رغم انها عندها تليفزيون تانى فى الليفنج ( اه يا عم احنا عندنا ليفنج و 3 تليفزيون ) و مش بس سيطرت على الاوضة لا دى فرضت حظر التدخين وطبعا محسوبكم كل ما يحب يشرب سيجارة يطلع البلكونة ( حكم القوي بقى واذا كان عاجبك ) ده غير بقى الاوامر الاستعبادية اللى تشل و تجيب هطل منها على سبيل المثال لا الحصر ناولنى النضارة - هات بقى جراب النضارة - و النبى يا حبيبى ناولنى البف ( الشلتة ) - بقولك ايه ما تجيب البيبسى و طبق الفاكهة _ قوم صلى العشا ( طيب ما تصليها انتى الاول ) - الخ الخ الخ الخ
المهم اديت ظهرى للتليفزيون و قعدت استعد اكتبلكم تدوينة جديدة بحضرلها بقالى يومين ( ان شاء الله هانشرها بعد التدوينة اللى بين ايديكم دلوقتى ) وقلت اكفى خيرى شرى وفجأة ؟؟؟؟؟!!!!!
لا قيت التليفزيون بيذيع اهم الانباء ( تفجير محدود فى منطقة الحسين و الضحايا 4 مصابين و مافيش قتلى ) و طبعا كان اول رد فعل شعبى لازم يصدر من امى حطيت ايديها على بقها و قالت ( يا ولاد الكلب هى البلد ناقصة ) اما عن رد فعلى كراجل مسئول و صاحب مدونة عدد زوارها لم يتجاوز عدد اصابع اليد الواحدة حتى الان فكان رد فعلى هو الامساك بالريموت كنترول و الاتجاه الى قناة الجزيرة اللى قالت ( انباء عن وقوع انفجار قوى و الضحايا 8 دون وقوع قتلى ) يتواصل رد الفعل الشعبى من امى و يستمر الدعاء على الارهابيين ولاد الكلب ( اللهم تقبل يا رب ) بس طبعا امى ماتخليتش عن المبد ( حول يا ابنى هات المسلسل انا مش ناقصة وجع قلب ) .
طبعا اخوكم فقد الامل فى المتابعة التليفزيونية لأنى عارف ان بعد مسلسل القناة الاولى فى مسلسل على القناة الثانية ( بتاع الامورة نور واسم النبى حارسه وصاينه سى مهند ) وطبعا امى لم ممكن تسغنى عن الحلقة علشان خاطر ابنها الغلبان ابو دقن و شعر منكوشين .
قلت يا واد سيبك من الخناق مع امك دى كده كده امك ونفس الوقت واحدة نسوان و انت راجل لم الدور و عليك و على الانترنت اهو ينفع و المصادر متعددة وقد كان و ياريت ماكان !!!!!!!!!
على الانترنت يا سادة كتبت انفجار الحسين و عملت سيرش و طلعت النتيجة اللى حيرتنى انا و كل اللى اتكلمت معاهم فى الموضوع ده بعد كده و النتائج هى
- انفجار بحى الحسين بالقاهرة و الضحايا 4 قتلى و المصابين 17 من جنسيات مختلفة ( سويس انفو نقلا عن رويترز )
- انفجار بحى الحسين السياحى بالقاهرة و لايوجد قتلى و المصابون 8 من جنسيات مختلفة ( الجزيرة نت )
-انفجار عنيف يهز وسط القاهرة و الضحايا 11 ( بى بى سى ) الخ الخ الخ ده غير بقى ان فى ناس بتقول ان القنبلة اترمت من فوق الفندق اللى فى الميدان وناس تقول لا دى كانت تحت مقعد فى قهوة فى الميدان و ناس تانية تقول لا دى كانت تحت دكة من بتوع الحبيبة اللى فى الجنينة اللى قدام المشهد الحسينى على فكرة كل الاراء دى لناس كانوا قاعدين فى بيوتهم مش شهود عيان يعنى .
ما علينا قلت انزل اروح عند الواد محمد صديقى علشان البروفة ( هو انا ماقلتلكوش انى عضو فى فرقة مزيكا بلعب ساكس و ان الفرقة دى عدد جمهورها اكبر من عدد زوار مدونتى بحاجة بسيطة ؟ ) رحت لاقيته هو الفرقة قاعدين بيتفرجوا على البيت بيتك جيبت كرسى و قعدت بالعكس وقلت اما نشوف التليفزيون يمكن يكون غير النت و الفضائيات لكن للاسف الوضع طلع مش احسن بكتير
تامر امين بيذيع بيان الداخلية و بيقول القنبلة كانت تحت مقعد و بعدين يتصل بالمراسل من موقع الانفجار يقوم الاخ المراسل يقول انه واقف مع مدير امن القاهرة اللى اكد بدوره ان القنبلة القيت من الفندق.
و بعدين يتصل السيد مكرم محمد احمد نقيب الصحفيين وهنا بقى يبداء فاصل غريب من التشتيت الغير مقصود من السادة مقدمى البرنامج ( تامر امين و عم خيرى رمضان ) و معهم نقيب الصحفيين خد عندك
سؤال : تفتكر مين وراء الحادث ؟
جواب : انا شايف انه مش ممكن يكون تنظيم القاعدة لان تنظيم القاعدة لما بيعمل عمل ارهابى بيعمل كذا حادث مع بعضهم و بيبقى عاوز يوقع اكبر عدد من الضحايا و هذا لا ينطبق على حادث اليوم وانا اعتقد انه حادث فردى .
بس ممكن نقول ان الاجهزة الامنية فى مصر ضيقت الخناق على تنظيم القاعدة بما لا يسمح بقيامه بعمليات كبرى فلجأ لمثل هذه الحوادث الفردية !!!!!!!!!!!!!!!!!!!!!!!!!!!!
سؤال : هل تعتقد ان هناك من يحاول تشويه سمعة مصر خصوصا بعد ان انتهت ازمة غزة بنتيجة واحدة ثابتة ان مصر هى صاحبة الدور الاكبر فى الحفاظ على امن المنطقة و خصوصا ان هناك قوى خارجية تحاول سحب بساط الزعامة العربية من تحت اقدام مصر ؟
جواب : نعم وارد جدا وايضا هناك احتمال ان يكون فتح معبر رفح هو سبب حيث اتاح الفرصة للمتسللين من الحركات المعادية لمصر لتفيذ هذا العمل !!!!!!!!!!!!!!!!!!!!!!!!!!!!! و استمر الحديث على هذا المنوال استبعد قيام الجهة الفلانية بالقيام بالعمل الارهابى و فى نفس الوقت لا استبعد !!!!!!!!!!!!!!!!!!!!!!!!!!!!!!!!
انتهت المكالمة و اعلن المذيع تامر امين ان الداخلية قد اتصلت و اعلنت ان البيان السالف ذكره كان حصر اولى و ليس بيان نهائى ( طيب الحمد لله ) يعنى نستنى البيان النهائى علشان نعرف الحقيقة و الملابسات .
قلت للفرقة انا جعان قالوا نروح ناكل كبدة ومخ عند ادهم الشرقاوى ( ليه بتوع الكبدة والمخ كلهم اسمهم الشرقاوى ؟ ) وبعدين نروح نشيش على القهوة ( ولا واحد مننا بيشيش ) المهم واحنا فى المطعم و القهوة سمعنا اراء الناس خد بالك هاقولك شوية منهم بس علشان ابقى خلصت ضميرى خد عندك
- واحد قال اللى عمل الموضوع ده فلسطيني علشان موضوع المعابر .
- واحد تانى قال تلاقيه واد عاطل مش لاقى شغل و متخانق مع البت بتاعته علشان مش عارف يجي يخطبها فعمل كده علشان ينتقم من الحكومة و من ام البنت .
- واحد تانى قال لا اللى عمل الموضوع ده ايمن نور علشان يقول للحكومة انه مش ناوى خير .
- واحد تانى قال لا دول السنية هما اللى عملوا الموضوع ده علشان مسجد الحسين ده مزار شيعى .
- واحد قالك الموضوع ده مش سياسى تلاقيهم شوية عيال من المناطق المجاورة لحى الحسين اتخانقوا و دى قنبلة مونة من بتاعت خناقات اليومين دول يعنى شوية عيال من بتوع دولايب المخدرات .
- واحد دم امه خفيف قالك تلاقى العيال بتوع الالتراس الاهلوى هما اللى عملوها خصوصا ان وقت التفجير تزامن مع احراز بتروجيت هدف التعادل ( منك لله ياللى فى بالى و فينك يا سد يا عالى ) .
- واحد تانى قال بمنتهى الثقة لا لا لا اكيد الموساد الاسرائيلى و بوش ورا الموضوع ده علشان بوش عاوز يحتل مصر بحجة ان فيها ارهاب ( كلنا ردينا فى صوت واحد بوش مين يا ابن الصرمة بوش خلاص خد بالجزمة وغار فى ستين داهية ) رد وقال والله ؟؟ يبقى اوباما هو اللى عمل كده علشان يخوف مصر حاكم الغربال الجديد له شدة .
قلنا نروح و الساعة كانت واحدة ونص و لما روحت فتحت التليفزيون لقيت شؤيط الاخبار بيقول :
قتيلة فرنسية و عشرون مصاب هم الحصيلة النهائية لحادث التفجير الارهابى بحى الحسين و النيابة العامة تباشر التحقيق .
يعنى هو احنا لو بطلنا نفتى و نألف و نتبلى على الناس نموت ؟
بكرة الحقيقة تبان و ان شاء الله هانعرف مين المختل عقليا اللى عمل كده . انا لا اقصد الاشارة او التلميح بوصف الجانى بالمختل عقليا ولكن هو فى من وجهة نظر العبد لله المتواضعة فعلا مختل عقليا .
نعم مختل عقليا كل من يحاول التعبير عن نفسه بالعنف و ابقتل الابرياء . مختل عقليا كل من تسبب فى ايذاء الناس فى ارزاقهم فكم من بيتا مفتوح سيقطع رزقه بسبب ذلك العمل الخسيس . مختل عقليا كل من يشوه صورة بلدى مصر او حتى يعتقد ذلك . مختل عقليا كل مرتزق مأجور يكسب اجره نظير الايذاء و القتل و التشويه وقطع الارزاق حسبنا الله ونعم الوكيل .
يا جماعة الساعة دلوقتى 3 الا ربع صباحا وسجايرى خلصت هسيبكم و انزل الحق منعم بتاع الكشك قبل ما يقفل و تبقى ليلة سودا سلام بقى و اسف على الاطالة .

اهههه فى ملحوظة صغيرة

اسمحولى اشجب و ادين و استنكر تكاسل المفتش كرومبو و مساعده سحس بمب فى كشف غموض حادث تفجير الحسين و لو حد منكم عرف السبب يرد على مستنى ردودكم.

وبعدين بقى ؟؟؟؟؟

بالنسبة لموضوع البنت دينا اللى نشرته من كام يوم واللى عرض فى برنامج البيت بيتك يوم 18 فبراير 2008 .
بعض اصدقائى اللى تابعوا الحلقة الى اخرها قالولى ان الاستاذ محمود سعد اعلن ان البرنامج قد تلقى معلومات من الداخلية المصرية جاء فيها :
انه بمجرد قيام والد الطفلة دينا ببلاغ الى قسم الشرطة تم عمل اللازم و تم القاء القبض على جار صديق الوالد اما بخصوص صديق والد الضحية فإن التحقيقات قد اشارت الى قيام والد الضحية باجبارها على تلفيق التهم اليه ( صديق الوالد ) .
الى هنا انتهى الايضاح الصادر من الداخلية و لكن يبقى السؤال فين الحقيقة يا خال ؟ على رأى منير حبيب قلوبنا كلنا .
الحقيقة يمكن تكون عند البنت الضحية ؟ وفى الحالة دى تبقى قالت الصدق لأن اللى شفته بيقول كده اما لو كان غير الصدق يبقى البنت دى تاخد جايزة اوسكار فى التمثيل بس تستلمها فى مؤسسة الرعاية ( اصلاحية الاحداث ) .
و الحقيقة ممكن تكون عند ابو الضحية ؟ برده ممكن يكون صادق و انا شخصيا اتمنى ذلك او يكون كذاب و فى الحالة دى يعرفنا ليه عمل كده و اجنا بنزوره فى السجن و هو بعيد عن اولاده و عن الفول و الطعمية اللى قال انه مش لاقى غيرهم يأكلهم لعياله .
الحقيقة ممكن تكون عند صديق الوالد ؟ احتمال و لو كان برئ يبقى اتمنى انه يسامحنى على اللى قلته فى التدوينة السابقة و هايكون ليه الحق فى اللى هو عاوزه من اى حد شارك فى توجيه الاتهام اليه و ممكن يكون فعلا ارتكب الجريمة القذرة دى و فى الحالة دى يبقى الوضع على ما هو عليه .
و ممكن تكون الحقيقة عند الداخلية ؟ اه طبعا و ده لازم مش ممكن لان ده واجبهم نحو المجتمع وفى الحالة دى نبقى احنا عاوزين حد يتقدم للمحاكمة علشان يبقى عبرة لكل من يعتبر . يعنى لو كان ابو البنت بيتبلى على صديقه و اجبر بنته على ذلك يبقى لازم يتحاكم علشان احنا كلنا ضد الظلم والتلفيق و قلة الادب دى صح يا حكومة ؟؟؟ اما لوكان صديق الوالد فعلا ارتكب الجريمة دى يبقى برده لازم يتقدم للمحاكمة علشان يعرف ان اعراض الناس مش لعبة و ان البنت دى هى واهلها ليهم حقوق اسمها حقوق الانسان صح يا حكومة ؟؟؟؟؟ و لا ايه ؟ .
اما لو كانت الحقيقة عند عم محمود سعد و اسرة البيت بيتك فهنا بقى اقوله كلام اغنية منير اللى قلته فى اول التدوينة
فين الحقيقة يا خال ؟؟؟؟

ملحوظة

فى التدوينة اللى عرضت فيها قضية دينا سميت التدوينة يا نهار اسود على اساس ان كلام دينا وابوها لو صح يبقى فعلا مصيبة و احنا كبسطاء مصريين لما بتحصل مصيبة بنقول يا نهار اسود .
طيب لو طلع ان دينا و ابوها بيكذبوا و بيلفقوا تهم لحد برئ او طلعت الداخلية مش عارفة الحقيقة و متخبطة تفتكروا اكتب الحقيقة لما تظهر تحت عنوان ايه ؟؟؟؟؟؟
مستنى ردودكم

!!!!!!! يا نهار اسود

حد فيكم شاف برنامج البيت بيتك يوم الاربعاء 18 فبراير 2009 ؟
شفتم الطفلة دينا اللى عندها 14 سنة و اغتصابها واحد صاحب ابوها عنده 40 سنة و هو قاعد بيحشش فى نهار رمضان والناس صيام ؟
القصة كما روتها دينا وابوها للاعلامى الكبير صاحب الفلب الكبير ( محمود سعد ) كتالى :
كنت رايحة العب مع عيال عم .......... ( هنا منعاها ابوها و الاستاذ محمود سعد من ذكر اسمه ) و بعدين مالقيتش العيال موجودين و لقت عم زفت بيقولها ادخلى عاوزك فى مصلحة و هاتمشى على طول و كان بيشرب سيجارة حشيش و الكلام ده كان فى اوائل شهر رمضان .
المهم عم زفت عم زبالة عم خنزير و اسمحولى لو قلت اكتر من كده ده اقل واجب مع كلب زى ده . المهم اغتصب البنت الساذجة اللى فعلا لما تشوفها تحس انها بقى عندها 80 سنة ليس من حكمة ما تقول و لكن مما رسمته تلك الكارثة على وجهها الصغير وللعلم البنت فعلا كما قال عمنا الكبير محمود سعد لا تحمل اى معنى من معانى الانوثة او الاثارة ( حسبنا الله ونعم الوكيل ) المهم فضل ينتيل على عين امه مع البنت الغلبانة لحد ما واحد جاره شافه
طبعا الكل بيقول الحمد لله اكيد الراجل جاره اللى شافه ده هينقذ البنت من ايد لخنزيز ده
لكن للاسف طلع خنزير زيه و قاله بالحرف الواحد على حسب رواية المجنى عليها ( فيها يا اخفيها ) و طبعا التانى ما مانعش وافق و ساب الجاره اللى عنده 25 سنة هو كمان يشاركه فى اغتصاب فريسته و لما خلصوا شهوتهم القذرة سابوها تروح بيت ابوها وخلاص كأن شيا لم يكن ود طبعا بعد تهديدها انها اذا ابلغت اهلها سيقتلون اخوها و ابوها .
بعد فترة من الزمن لاحظ الاب العامل الغلبان اللى بيرجع بيته الساعة 3 صباحا من شغله لاحظ هو و الام تغيرات غريبة على البنت المعتدى عليها وراحوا بيها للدكتورة و كانت الفاجعة الكبرى البنت حامل فى شهرها السابع
توجه الاب الحزين بطفلته الى قسم الشرطة وهناك روت الطفلة لرجال الشرطة تلك الواقعة بعد ان اضافت الجديد و الذى يتمثل فى ان هذان الخنزيران تابعوا اغتصابها على فترات متعددة بل كانوا يرسلون فى طلبها طبعا تحت نفس التهديد و حكت ان رد فعلها الوحيد كان البكاء نعم البكاء فقط و الخوف مما ينتظرها حين يعرف اهلها بما يحدث .
يا الهى كم هو حمل ثقيل على امرأة راشدة حتى وان كانت سيئة السلوك فما بالك بهذا الحمل يلقى على عاتق طفلة عمرها 14 سنة لك الله يا دينا لك الله يا مسكينة .
نعود للقصة الحزينة فبعد الذهاب الى قسم الشرطة تم استئذان النيابة للقبض على الجانيان و بالفعل تم القبض على الخنزير الصغير و هنا قامت اسرته بعرض او بمساومة والد الضحية بالمال او تزويج الطفلة لابنهم الجانى لمدة قصيرة ثم يطلقها يا اخى ......... ؟؟
اما الخنزير الكبير فعرض و ذلك قبل هروبه ان يزوج الطفلة الضحية لاخيه المريض بالتخلف العقلى يا خى مليون ......... ؟؟
الى هنا انتهت رواية الضحية و والدها و هنا حاول الاستاذ محمود سعد ان يحاور الطفلة و لكن لا حياة لمن تنادى الطفلة لا تستطيع التحدث او الرد فالذهول هو المسيطر الاول على هذة الطفلة المسكينة البريئة البسيطة هى و والده المسكين البسيط الذى اقسم انه لكى يتفرغ لمتابعة قضية شرف ابنته ترك عمله و اصبح الفول و الطعمية هما غذاء الاسرة الاوحد هذا ان وجد و قد ايدته الضحية حين ردت على سؤال الاعلامى الكبير لما قالها : بقالك قد ايه يا دينا ما أكلتيش لحمة ؟
فردت بوجه شاحب مصفر من اثر الذهول و الحمل : بقلنا كتير قوى .
يا سادة ان هذا الرجل لا يطالب بأقصاء رئيس الجمهورية و لا يطالب بأقالة وزير الداخلية و لا يعرض فيديو لتعرض ابنته للضرب من قبل رجال الشرطة و لم يطلب العون المادى من البرنامج ولكن كل ما طلبه هو حقه نعم حقه و حق طفلته فقط لا اكثر حيث قال ان المتهم الهارب معروف مكانه و قد صدر له امر ضبط و احضار من قبل النايبة العامة و لكن لم يحرك احد من السادة ضباط قسم تانى بهتيم ساكنا للقبض عليه .
انه الحق لا اكثر هو المطلوب لا نريد غيره فمن لهؤلاء المساكين الذين لا حماية لهم الا الله وحده ثم حكومتهم و شرطتها فهل تكون عند حسن ظنهم ؟
ادعو الله العلى العظيم ان يرد الحق الى اصحابه و ان يقتص من الظالمين فى الدنيا والاخرة الله تقبل
ملحوظة :
الى كل المدونون اصحاب الاقلام و الكلمات التى تنتقد اسلوب الشرطة فى معاملة بعض المجرمين و الخارجين عن القانون و يلصقون بهم تهم التعذيب الوحشية و الممنهجة من قبل وزارة الداخلية دون مرعاة ان الضباط والامناء دول برده بشر مثلنا لهم شعور قد يخرجون عليه احيانا . اليهم جميعا اوجه هذا السؤال الصغير

لو دينا دى اختك او بنتك او حتى ساكنة فى شارعكم كنت هاتعمل ايه فى الخنزيرين دول ؟
مستنى ردكم

. انا و لودى

ميلاد منير اسمه كده مصرى مسيحى متزوج و يعول سنه نفس سنى بس تفرق شهور انا مسلم وهو مسيحى عرفنا بعض ايام الدراسة الاعدادية وكمان حنا الاتنين مولودين فى نفس الحى الشعبى اتصاحبنا و بقينا انتيم عمرنا ما حسينا ان الدين عامل بينا فارق اتكلمنا فى الدين كتير بس بأدب عمرنا ما شتمنا بعض ولا حد فينا غلط فى دين التانى .
افترقنا انا و لودى صديقى شوية ايام ثانوى و الجامعة علشان مجال تعليمنا اختلف هو صنايع و بعدها معهد و انا ثانوية عامة وبعدها حقوق عين شمس .
التقينا تانى بحكم العمل هو اشترى تاكسى و العبد لله قبل ما يجيب عربية مستعملة بالقسط كان مابيركبش غير تاكسى أسترجعنا الذكريات و خططنا لمستقبل مع بعض اكل معايا انا واخواتى واكلت معاه هو واخواته سهرنا سوا خرجنا سوا علقنا بنات سوا . كنت لما اعوز فلوس ما اطلبش من امى اجرى على لودى و لو معهوش يروح يستلف كنت اصحيه الساعة 4 صباحا اقوله عاوز اروح مشوار الاقيه لبس هدومه قبلى عرفت كل حاجة فى بيته و عرف كل حاجة عن بيتى .
الولد ده اتربى صح ابوه مسيحى متدين بس كان لازم يوم الجمعة يتفرج على الشيخ الشعراوى و يقول بحبه و بحب كلامه ولما يجى رمضان كان عم منير ابو ميلاد يروح يجيب الياميش لبيتهم زى المسلمين بالضبط و كذلك فى المولد .
وفى المناسبات عندهم يعزمونى و اخرج معاهم .فى رمضان ميلاد كان مستحيل يشرب حتى كباية مياه قدامى احتراما لصيامى وانا فى صيامه لما كنا نبقى مع بعض يبقى الاكل لازم يكون كشرى او فول و طعميه.
يوم وفاة والدى ميلاد هو اللى استخرج شهادة وفاة ابويا حاليا . لما كنت باسيب شغلى او هو يبقى مش شغال كنا نقسم الفلوس اللى معانا بالنصف مش مهم مين معاه كام .
كنا ننتقد بعض فى كل حاجة و نزعل من بعض ونتصالح ولما اكون مزعل امى كانت تتصل تجيب لودى علشان يهدى الجو بينى وبينها .
مرة اتخانقت مع ابن خاله راح لودى من غير ما يعرف السبب ضرب ابن خاله على فكرة ابن خاله ده من الناس المقربة قوى ليا دلوقتى .
دى كانت مقتطفات من عشرتى مع لودى ابو ماريا و ميريم اللى باموت فيهم و فى خفة دمهم .
طبعا انا عارف انكم بتقولوا انت بتوجع دماغنا ليه انت وسى لودى بتاعك ده ؟
انا كتبت الكلام ده علشان اقول للناس اللى بتقول ان المسلمين و المسيحيين فى مصر بيكرهوا بعض اخرسوا بقى و جعتم دماغنا يا متخلفين يا مأجورين .
طول عمر المسلميين والمسيحيين فى مصر اهل و عشرة مش هننكر ان فى ناس فى الطرفين عندهم العقدة دى و موجودة بس مش هما الاغلبية .. الغالبية العظمى هى اللى زيى انا و ميلاد اصحاب اصدقاء اخوات مافيش بينا غير الخير و الحب بس .
مش بس انا و لودى دا فى كتير قوى زينا عمرهم ما حسوا بالفرق عارفين ليه ؟
يا ريت تكتبولى و تقولولى ليه

عفوا استاذى

بقالى كتير قوى عاوز اعمل المدونة دى بس مش عارف ابتدى منين ؟
من الناس الكويسة اللى عاوزها تكون اكوس ؟ ولا من الناس الوحشة اللى بتمنى ترحل او يجيلها شوطة ؟
اصل العبد لله عامل نفسه راهب من رهبان معبد بوذا اللى بيحبوا التأمل بس خلاص بقى زهقت من التأمل و الفرجة و ناوى اتكلم .
هاقول اللى عندى واللى ربنا يقدرنى عليه خصوصا ان اخوكم بلا فخر عاطل بقاله حوالى شهر ونص بدون عمل يعنى فاضى و الحمد لله مش مفلس بس قربت افلس وطبعا احنا عارفين ان الفلس من المادى من اهم اسباب الابداع العقلى .
المهم مش هاطول عليكم احسن تفتكرونى عاوزكم تلمولى فلوس ولا حاجة يعنى انا بقى هاتكلم النهارده وفى اول موضوع فى المدونة دى عن واحد انا بعتبره وبكل صدق استاذ من قلائل بعتبرهم اساتذه للعبد لله .
الراجل ده جرئ شجاع مقدام حر ومشهور ذكى مثقف جدا سياسيا صحفى عرف يسمع كلمته للناس من غير ما يكون خادم معدوم الكرامة فى بلاط البت اللى بيسموها صاحبة الجلالة انا بقول البنت والله اعلم هى لسة بنت ولا خلاص عود الكبريت ولع من زمان اصلها ياعينى مسكينة واللى اغتصبوها كتير وخلوها مرمطة مش صاحبة جلالة ولا حتى صاحبة حمارة فى عزبة الاخ المدون الشهير بتاع العزبة .
طبعا عرفتم انا هما مين المغتصبون دول بس خلى بالكم ان بعض الظن اثم
نرجع بقى لعمنا الاستاذ اللى كنت بتكلم عليه وقلت عنه كلام كتير شجاع جرئ حر ده غير ان اهم حاجة يمتلكها هى انه عنده الوعى المصرى ؟؟
طبعا هو الاستاذ وائل عباس احد رموز صحافة التدوين فى مصر و الوطن العربى و مش هاكون مبالغ لو قلت فى العالم واللى مش مصدق يعد جوائز وائل عباس العالمية
طبعا فى ناس دلوقتى بتقول الواد ده منافق و بيمسح جوخ لوائل عباس !!!!!!
حاسب يا عم انت و هو وائل عباس مش هيشغلنى عنده فى المددونة ولا هيمسكنى ادارة الاعلانات فيها و اخد عمولة شهرية 2 مليون جنيه
بل انا بقى عندى ليكم مفاجأة انى على الرغم من اعجابى الشديد باسلوب وائل عباس الا انى كتير جدا ما بحبش كتاباته وتدوينته ولا حتى دعواته .
اه فعلا وائل عباس صحفى جرئ ومغامر بس احيانا كتير بحس انه بيحكم على الامور بسرعة جدا و كتير بيطلع الامور فيها التباسات كتير
ده غير ان وائل عباس خصص كل شغله الصحفى للهجوم على الحكومة و الحاكم وبس وده برده انا شايف فيه شئ من الاجحاف معلش يا عم وائل استحمل كلام اخوك الصغير و لو انا غلط علمنى .
مش كل ضابط شرطة يعمل حاجة غلط او يكون مركب النقص عالى حبتين عنده يخلينا نحكم ان هى دى اخلاق كل ضباط الشرطة و مش كل واحد بيضرب فى اقسام الشرطة نجرى ونقول حقوق الانسان لسبب بسيط ان البيه المضروب هو اول واحد مش بيحترم جقوق الانسان اللى من ابسط الاسس اللى بتنادى بيها هو حق الفرد فى العيش فى امان دون ترويع
مش كل خناقة بين شوية بلطجية و مدمنيين و تجار مخدرات تبقى مثال للوضع الامنى فى مصر مش كل حد اتخانق فى جامع او كنيسة لازم يكون مأجور من الحكومة او الحزب الفلانى ومش لازم يبقوا هما هما العيال اللى عملت مشاكل فى وسط البلد.
استاذى العزيز وائل عباس :
كل اللى انا قلته ده بنائا على متابعتى لموضوعاتك فى مدونة الوعى المصرى و لو حبيت نتناقش في كل امر على حده انا مستعد لان ده هايكون شرف ليا انى احاور عملاق زيك
بس بجد يا وائل احنا زهقنا من صحافة و اعلام اغش و التزييف و الماس الكهربائى و المختليين عقليا و كمان من صحافة الشتيمة و السب عمال على بطال و ونفسى اشوف صحافة بتقول الحق و بس من غير تحيز لناس على حساب ناس ومن غير سعى للشهرة وبس .
انا بجد نفسى كلامى مايزعلكش يا وائل البلد دى فيها ناس كويسة كتير و كتير قوى كمان منهم ضباط و مسئوليين و رجال اعمال و طلاب و عمال و شيوخ و قسس و اعلاميين و حرفيين وفنانين .
طيب فين حقهم عندك وعند زملائك المدونين من فضلكم اكتبوا عنهم حسسهم انهم فى دائرة اهتمامك و سيونا شوية من لعبة القط و الفار اللى بقت ماسخة قوى و ملهاش طعم غير طعم العناد اللى من غير هدف يعنى عناد من اجل العناد و خلاص .
انا عارف انك ممكن تقولى ان ده رأيك ودى مدونتك و انك حر تنشر اللى عندك لانك مش بتشتغل عند حد !!!!!!
بس انا شايف ان ده حقى عليك زيى زى اى حد بيهتم بموضوعاتك و بيحث عن المصداقية فى كلامك .
الكلام كتير وانا مش صحفى متمرس و دى مجرد محاولة منى بس انا فعلا قررت انى ابطل تأمل و ناوى اتفاعل و اكتب و انشر واحاور اللى عاوز يتحاور بأدب .
هما كلمتين قلتهم و ريحونى شوية و لحد ما انشر تانى مستنى رد الاستاذ و ائل عباس او ردودكم على موضوعى ده و مستعد لأى نقاش او حوار او توضيح .