. انا و لودى

ميلاد منير اسمه كده مصرى مسيحى متزوج و يعول سنه نفس سنى بس تفرق شهور انا مسلم وهو مسيحى عرفنا بعض ايام الدراسة الاعدادية وكمان حنا الاتنين مولودين فى نفس الحى الشعبى اتصاحبنا و بقينا انتيم عمرنا ما حسينا ان الدين عامل بينا فارق اتكلمنا فى الدين كتير بس بأدب عمرنا ما شتمنا بعض ولا حد فينا غلط فى دين التانى .
افترقنا انا و لودى صديقى شوية ايام ثانوى و الجامعة علشان مجال تعليمنا اختلف هو صنايع و بعدها معهد و انا ثانوية عامة وبعدها حقوق عين شمس .
التقينا تانى بحكم العمل هو اشترى تاكسى و العبد لله قبل ما يجيب عربية مستعملة بالقسط كان مابيركبش غير تاكسى أسترجعنا الذكريات و خططنا لمستقبل مع بعض اكل معايا انا واخواتى واكلت معاه هو واخواته سهرنا سوا خرجنا سوا علقنا بنات سوا . كنت لما اعوز فلوس ما اطلبش من امى اجرى على لودى و لو معهوش يروح يستلف كنت اصحيه الساعة 4 صباحا اقوله عاوز اروح مشوار الاقيه لبس هدومه قبلى عرفت كل حاجة فى بيته و عرف كل حاجة عن بيتى .
الولد ده اتربى صح ابوه مسيحى متدين بس كان لازم يوم الجمعة يتفرج على الشيخ الشعراوى و يقول بحبه و بحب كلامه ولما يجى رمضان كان عم منير ابو ميلاد يروح يجيب الياميش لبيتهم زى المسلمين بالضبط و كذلك فى المولد .
وفى المناسبات عندهم يعزمونى و اخرج معاهم .فى رمضان ميلاد كان مستحيل يشرب حتى كباية مياه قدامى احتراما لصيامى وانا فى صيامه لما كنا نبقى مع بعض يبقى الاكل لازم يكون كشرى او فول و طعميه.
يوم وفاة والدى ميلاد هو اللى استخرج شهادة وفاة ابويا حاليا . لما كنت باسيب شغلى او هو يبقى مش شغال كنا نقسم الفلوس اللى معانا بالنصف مش مهم مين معاه كام .
كنا ننتقد بعض فى كل حاجة و نزعل من بعض ونتصالح ولما اكون مزعل امى كانت تتصل تجيب لودى علشان يهدى الجو بينى وبينها .
مرة اتخانقت مع ابن خاله راح لودى من غير ما يعرف السبب ضرب ابن خاله على فكرة ابن خاله ده من الناس المقربة قوى ليا دلوقتى .
دى كانت مقتطفات من عشرتى مع لودى ابو ماريا و ميريم اللى باموت فيهم و فى خفة دمهم .
طبعا انا عارف انكم بتقولوا انت بتوجع دماغنا ليه انت وسى لودى بتاعك ده ؟
انا كتبت الكلام ده علشان اقول للناس اللى بتقول ان المسلمين و المسيحيين فى مصر بيكرهوا بعض اخرسوا بقى و جعتم دماغنا يا متخلفين يا مأجورين .
طول عمر المسلميين والمسيحيين فى مصر اهل و عشرة مش هننكر ان فى ناس فى الطرفين عندهم العقدة دى و موجودة بس مش هما الاغلبية .. الغالبية العظمى هى اللى زيى انا و ميلاد اصحاب اصدقاء اخوات مافيش بينا غير الخير و الحب بس .
مش بس انا و لودى دا فى كتير قوى زينا عمرهم ما حسوا بالفرق عارفين ليه ؟
يا ريت تكتبولى و تقولولى ليه