خناقة بين و بين امى على التليفزيون هى عاوزة مسلسل القناة الاولى الارضية و انا عاوز دريم الفضائية . الخناقة بتزيد امى بتقولى انا سيبالك الماتش ( امى زملكاوية ) وانا بارد عليها لسه بدرى على المسلسل يا حاجة استنى عاوز اسمع تعقيب زيزو و مصطفى يونس على الماتش دا طبعا وانا دمى محروق لان بتروجيت خطف التعادل المستحق ايوه المستحق لان الاهلى جاب اهدافه ببركة حجاب الشيخ سحاب اما بتروجيت فسجل اهدافه ببركة الشيخ امير الحارس الكبير ....
ماعلينا طبعا المعركة انتهت بفوز الحاجة امى و فرضت سيطرتها على اوضتى رغم انها عندها تليفزيون تانى فى الليفنج ( اه يا عم احنا عندنا ليفنج و 3 تليفزيون ) و مش بس سيطرت على الاوضة لا دى فرضت حظر التدخين وطبعا محسوبكم كل ما يحب يشرب سيجارة يطلع البلكونة ( حكم القوي بقى واذا كان عاجبك ) ده غير بقى الاوامر الاستعبادية اللى تشل و تجيب هطل منها على سبيل المثال لا الحصر ناولنى النضارة - هات بقى جراب النضارة - و النبى يا حبيبى ناولنى البف ( الشلتة ) - بقولك ايه ما تجيب البيبسى و طبق الفاكهة _ قوم صلى العشا ( طيب ما تصليها انتى الاول ) - الخ الخ الخ الخ
المهم اديت ظهرى للتليفزيون و قعدت استعد اكتبلكم تدوينة جديدة بحضرلها بقالى يومين ( ان شاء الله هانشرها بعد التدوينة اللى بين ايديكم دلوقتى ) وقلت اكفى خيرى شرى وفجأة ؟؟؟؟؟!!!!!
لا قيت التليفزيون بيذيع اهم الانباء ( تفجير محدود فى منطقة الحسين و الضحايا 4 مصابين و مافيش قتلى ) و طبعا كان اول رد فعل شعبى لازم يصدر من امى حطيت ايديها على بقها و قالت ( يا ولاد الكلب هى البلد ناقصة ) اما عن رد فعلى كراجل مسئول و صاحب مدونة عدد زوارها لم يتجاوز عدد اصابع اليد الواحدة حتى الان فكان رد فعلى هو الامساك بالريموت كنترول و الاتجاه الى قناة الجزيرة اللى قالت ( انباء عن وقوع انفجار قوى و الضحايا 8 دون وقوع قتلى ) يتواصل رد الفعل الشعبى من امى و يستمر الدعاء على الارهابيين ولاد الكلب ( اللهم تقبل يا رب ) بس طبعا امى ماتخليتش عن المبد ( حول يا ابنى هات المسلسل انا مش ناقصة وجع قلب ) .
طبعا اخوكم فقد الامل فى المتابعة التليفزيونية لأنى عارف ان بعد مسلسل القناة الاولى فى مسلسل على القناة الثانية ( بتاع الامورة نور واسم النبى حارسه وصاينه سى مهند ) وطبعا امى لم ممكن تسغنى عن الحلقة علشان خاطر ابنها الغلبان ابو دقن و شعر منكوشين .
قلت يا واد سيبك من الخناق مع امك دى كده كده امك ونفس الوقت واحدة نسوان و انت راجل لم الدور و عليك و على الانترنت اهو ينفع و المصادر متعددة وقد كان و ياريت ماكان !!!!!!!!!
على الانترنت يا سادة كتبت انفجار الحسين و عملت سيرش و طلعت النتيجة اللى حيرتنى انا و كل اللى اتكلمت معاهم فى الموضوع ده بعد كده و النتائج هى
- انفجار بحى الحسين بالقاهرة و الضحايا 4 قتلى و المصابين 17 من جنسيات مختلفة ( سويس انفو نقلا عن رويترز )
- انفجار بحى الحسين السياحى بالقاهرة و لايوجد قتلى و المصابون 8 من جنسيات مختلفة ( الجزيرة نت )
-انفجار عنيف يهز وسط القاهرة و الضحايا 11 ( بى بى سى ) الخ الخ الخ ده غير بقى ان فى ناس بتقول ان القنبلة اترمت من فوق الفندق اللى فى الميدان وناس تقول لا دى كانت تحت مقعد فى قهوة فى الميدان و ناس تانية تقول لا دى كانت تحت دكة من بتوع الحبيبة اللى فى الجنينة اللى قدام المشهد الحسينى على فكرة كل الاراء دى لناس كانوا قاعدين فى بيوتهم مش شهود عيان يعنى .
ما علينا قلت انزل اروح عند الواد محمد صديقى علشان البروفة ( هو انا ماقلتلكوش انى عضو فى فرقة مزيكا بلعب ساكس و ان الفرقة دى عدد جمهورها اكبر من عدد زوار مدونتى بحاجة بسيطة ؟ ) رحت لاقيته هو الفرقة قاعدين بيتفرجوا على البيت بيتك جيبت كرسى و قعدت بالعكس وقلت اما نشوف التليفزيون يمكن يكون غير النت و الفضائيات لكن للاسف الوضع طلع مش احسن بكتير
تامر امين بيذيع بيان الداخلية و بيقول القنبلة كانت تحت مقعد و بعدين يتصل بالمراسل من موقع الانفجار يقوم الاخ المراسل يقول انه واقف مع مدير امن القاهرة اللى اكد بدوره ان القنبلة القيت من الفندق.
و بعدين يتصل السيد مكرم محمد احمد نقيب الصحفيين وهنا بقى يبداء فاصل غريب من التشتيت الغير مقصود من السادة مقدمى البرنامج ( تامر امين و عم خيرى رمضان ) و معهم نقيب الصحفيين خد عندك
سؤال : تفتكر مين وراء الحادث ؟
جواب : انا شايف انه مش ممكن يكون تنظيم القاعدة لان تنظيم القاعدة لما بيعمل عمل ارهابى بيعمل كذا حادث مع بعضهم و بيبقى عاوز يوقع اكبر عدد من الضحايا و هذا لا ينطبق على حادث اليوم وانا اعتقد انه حادث فردى .
بس ممكن نقول ان الاجهزة الامنية فى مصر ضيقت الخناق على تنظيم القاعدة بما لا يسمح بقيامه بعمليات كبرى فلجأ لمثل هذه الحوادث الفردية !!!!!!!!!!!!!!!!!!!!!!!!!!!!
سؤال : هل تعتقد ان هناك من يحاول تشويه سمعة مصر خصوصا بعد ان انتهت ازمة غزة بنتيجة واحدة ثابتة ان مصر هى صاحبة الدور الاكبر فى الحفاظ على امن المنطقة و خصوصا ان هناك قوى خارجية تحاول سحب بساط الزعامة العربية من تحت اقدام مصر ؟
جواب : نعم وارد جدا وايضا هناك احتمال ان يكون فتح معبر رفح هو سبب حيث اتاح الفرصة للمتسللين من الحركات المعادية لمصر لتفيذ هذا العمل !!!!!!!!!!!!!!!!!!!!!!!!!!!!! و استمر الحديث على هذا المنوال استبعد قيام الجهة الفلانية بالقيام بالعمل الارهابى و فى نفس الوقت لا استبعد !!!!!!!!!!!!!!!!!!!!!!!!!!!!!!!!
انتهت المكالمة و اعلن المذيع تامر امين ان الداخلية قد اتصلت و اعلنت ان البيان السالف ذكره كان حصر اولى و ليس بيان نهائى ( طيب الحمد لله ) يعنى نستنى البيان النهائى علشان نعرف الحقيقة و الملابسات .
قلت للفرقة انا جعان قالوا نروح ناكل كبدة ومخ عند ادهم الشرقاوى ( ليه بتوع الكبدة والمخ كلهم اسمهم الشرقاوى ؟ ) وبعدين نروح نشيش على القهوة ( ولا واحد مننا بيشيش ) المهم واحنا فى المطعم و القهوة سمعنا اراء الناس خد بالك هاقولك شوية منهم بس علشان ابقى خلصت ضميرى خد عندك
- واحد قال اللى عمل الموضوع ده فلسطيني علشان موضوع المعابر .
- واحد تانى قال تلاقيه واد عاطل مش لاقى شغل و متخانق مع البت بتاعته علشان مش عارف يجي يخطبها فعمل كده علشان ينتقم من الحكومة و من ام البنت .
- واحد تانى قال لا اللى عمل الموضوع ده ايمن نور علشان يقول للحكومة انه مش ناوى خير .
- واحد تانى قال لا دول السنية هما اللى عملوا الموضوع ده علشان مسجد الحسين ده مزار شيعى .
- واحد قالك الموضوع ده مش سياسى تلاقيهم شوية عيال من المناطق المجاورة لحى الحسين اتخانقوا و دى قنبلة مونة من بتاعت خناقات اليومين دول يعنى شوية عيال من بتوع دولايب المخدرات .
- واحد دم امه خفيف قالك تلاقى العيال بتوع الالتراس الاهلوى هما اللى عملوها خصوصا ان وقت التفجير تزامن مع احراز بتروجيت هدف التعادل ( منك لله ياللى فى بالى و فينك يا سد يا عالى ) .
- واحد تانى قال بمنتهى الثقة لا لا لا اكيد الموساد الاسرائيلى و بوش ورا الموضوع ده علشان بوش عاوز يحتل مصر بحجة ان فيها ارهاب ( كلنا ردينا فى صوت واحد بوش مين يا ابن الصرمة بوش خلاص خد بالجزمة وغار فى ستين داهية ) رد وقال والله ؟؟ يبقى اوباما هو اللى عمل كده علشان يخوف مصر حاكم الغربال الجديد له شدة .
قلنا نروح و الساعة كانت واحدة ونص و لما روحت فتحت التليفزيون لقيت شؤيط الاخبار بيقول :
قتيلة فرنسية و عشرون مصاب هم الحصيلة النهائية لحادث التفجير الارهابى بحى الحسين و النيابة العامة تباشر التحقيق .
يعنى هو احنا لو بطلنا نفتى و نألف و نتبلى على الناس نموت ؟
بكرة الحقيقة تبان و ان شاء الله هانعرف مين المختل عقليا اللى عمل كده . انا لا اقصد الاشارة او التلميح بوصف الجانى بالمختل عقليا ولكن هو فى من وجهة نظر العبد لله المتواضعة فعلا مختل عقليا .
نعم مختل عقليا كل من يحاول التعبير عن نفسه بالعنف و ابقتل الابرياء . مختل عقليا كل من تسبب فى ايذاء الناس فى ارزاقهم فكم من بيتا مفتوح سيقطع رزقه بسبب ذلك العمل الخسيس . مختل عقليا كل من يشوه صورة بلدى مصر او حتى يعتقد ذلك . مختل عقليا كل مرتزق مأجور يكسب اجره نظير الايذاء و القتل و التشويه وقطع الارزاق حسبنا الله ونعم الوكيل .
يا جماعة الساعة دلوقتى 3 الا ربع صباحا وسجايرى خلصت هسيبكم و انزل الحق منعم بتاع الكشك قبل ما يقفل و تبقى ليلة سودا سلام بقى و اسف على الاطالة .
اهههه فى ملحوظة صغيرة
اسمحولى اشجب و ادين و استنكر تكاسل المفتش كرومبو و مساعده سحس بمب فى كشف غموض حادث تفجير الحسين و لو حد منكم عرف السبب يرد على مستنى ردودكم.
المشاركات
تدوينة حلوة اسلوبها شبابى يعنى
ردحذفاما الارهاب فده امر بيحيرنى جدا : بمعنى افكر دايما ايه اللى ممكن يوصل انسان لهذا الكم من العنف فى تصرفاته والفتك بالبشر ايا كان لونهم ولا جنسيتهم ؟؟؟سؤال يبدو معقد والاجابة عليه اكثر تعقيدا!!!
لكن اسمحلى اقول انى زعلت شوية واستحملنى معلش :
من ان حضرتك بتدخن وانا مش هتكلم بقى عن التدخين واضراره واعيش دور الدكاترة ده لانه حقيقة والناس كلها عارفاها لكن انا هقول (يا رب ابن مصر الايجابى يهزم نفسه ويبقى ايجابى فى دى كمان ويبطل تدخين فى اقرب وقت )والله يا اخى انا بيصعب عليا شبابنا واخواتى اللى بعزهم جدا انهم يضيعوا نضرة الشباب وصحته عشان ايه ؟؟؟؟ مزاج مش اكتر !!
(يا رب كلامنا يكون خفيف عليكم )
واسفة على الاطالة
شكرا دكتور سوسن على مرورك الكريم و على نصيحتك الغالية وانا كمان معترف ان التدخين شئ سيئ للغاية بس انا حبيت اكون صريح وواضح مع قرائى و ادعيلى ان ربنا يقوينى و ابطل الزفتة دى مع العلم انى عارف ان الموضوع لازمه حبة عزيمة بجانب الدعاء مرة تانية شكرا على مرورك و منتظر ردودك ومشاركات حضرتك مش بس زيارة واحدة وخلاص
ردحذف