عفوا استاذى

بقالى كتير قوى عاوز اعمل المدونة دى بس مش عارف ابتدى منين ؟
من الناس الكويسة اللى عاوزها تكون اكوس ؟ ولا من الناس الوحشة اللى بتمنى ترحل او يجيلها شوطة ؟
اصل العبد لله عامل نفسه راهب من رهبان معبد بوذا اللى بيحبوا التأمل بس خلاص بقى زهقت من التأمل و الفرجة و ناوى اتكلم .
هاقول اللى عندى واللى ربنا يقدرنى عليه خصوصا ان اخوكم بلا فخر عاطل بقاله حوالى شهر ونص بدون عمل يعنى فاضى و الحمد لله مش مفلس بس قربت افلس وطبعا احنا عارفين ان الفلس من المادى من اهم اسباب الابداع العقلى .
المهم مش هاطول عليكم احسن تفتكرونى عاوزكم تلمولى فلوس ولا حاجة يعنى انا بقى هاتكلم النهارده وفى اول موضوع فى المدونة دى عن واحد انا بعتبره وبكل صدق استاذ من قلائل بعتبرهم اساتذه للعبد لله .
الراجل ده جرئ شجاع مقدام حر ومشهور ذكى مثقف جدا سياسيا صحفى عرف يسمع كلمته للناس من غير ما يكون خادم معدوم الكرامة فى بلاط البت اللى بيسموها صاحبة الجلالة انا بقول البنت والله اعلم هى لسة بنت ولا خلاص عود الكبريت ولع من زمان اصلها ياعينى مسكينة واللى اغتصبوها كتير وخلوها مرمطة مش صاحبة جلالة ولا حتى صاحبة حمارة فى عزبة الاخ المدون الشهير بتاع العزبة .
طبعا عرفتم انا هما مين المغتصبون دول بس خلى بالكم ان بعض الظن اثم
نرجع بقى لعمنا الاستاذ اللى كنت بتكلم عليه وقلت عنه كلام كتير شجاع جرئ حر ده غير ان اهم حاجة يمتلكها هى انه عنده الوعى المصرى ؟؟
طبعا هو الاستاذ وائل عباس احد رموز صحافة التدوين فى مصر و الوطن العربى و مش هاكون مبالغ لو قلت فى العالم واللى مش مصدق يعد جوائز وائل عباس العالمية
طبعا فى ناس دلوقتى بتقول الواد ده منافق و بيمسح جوخ لوائل عباس !!!!!!
حاسب يا عم انت و هو وائل عباس مش هيشغلنى عنده فى المددونة ولا هيمسكنى ادارة الاعلانات فيها و اخد عمولة شهرية 2 مليون جنيه
بل انا بقى عندى ليكم مفاجأة انى على الرغم من اعجابى الشديد باسلوب وائل عباس الا انى كتير جدا ما بحبش كتاباته وتدوينته ولا حتى دعواته .
اه فعلا وائل عباس صحفى جرئ ومغامر بس احيانا كتير بحس انه بيحكم على الامور بسرعة جدا و كتير بيطلع الامور فيها التباسات كتير
ده غير ان وائل عباس خصص كل شغله الصحفى للهجوم على الحكومة و الحاكم وبس وده برده انا شايف فيه شئ من الاجحاف معلش يا عم وائل استحمل كلام اخوك الصغير و لو انا غلط علمنى .
مش كل ضابط شرطة يعمل حاجة غلط او يكون مركب النقص عالى حبتين عنده يخلينا نحكم ان هى دى اخلاق كل ضباط الشرطة و مش كل واحد بيضرب فى اقسام الشرطة نجرى ونقول حقوق الانسان لسبب بسيط ان البيه المضروب هو اول واحد مش بيحترم جقوق الانسان اللى من ابسط الاسس اللى بتنادى بيها هو حق الفرد فى العيش فى امان دون ترويع
مش كل خناقة بين شوية بلطجية و مدمنيين و تجار مخدرات تبقى مثال للوضع الامنى فى مصر مش كل حد اتخانق فى جامع او كنيسة لازم يكون مأجور من الحكومة او الحزب الفلانى ومش لازم يبقوا هما هما العيال اللى عملت مشاكل فى وسط البلد.
استاذى العزيز وائل عباس :
كل اللى انا قلته ده بنائا على متابعتى لموضوعاتك فى مدونة الوعى المصرى و لو حبيت نتناقش في كل امر على حده انا مستعد لان ده هايكون شرف ليا انى احاور عملاق زيك
بس بجد يا وائل احنا زهقنا من صحافة و اعلام اغش و التزييف و الماس الكهربائى و المختليين عقليا و كمان من صحافة الشتيمة و السب عمال على بطال و ونفسى اشوف صحافة بتقول الحق و بس من غير تحيز لناس على حساب ناس ومن غير سعى للشهرة وبس .
انا بجد نفسى كلامى مايزعلكش يا وائل البلد دى فيها ناس كويسة كتير و كتير قوى كمان منهم ضباط و مسئوليين و رجال اعمال و طلاب و عمال و شيوخ و قسس و اعلاميين و حرفيين وفنانين .
طيب فين حقهم عندك وعند زملائك المدونين من فضلكم اكتبوا عنهم حسسهم انهم فى دائرة اهتمامك و سيونا شوية من لعبة القط و الفار اللى بقت ماسخة قوى و ملهاش طعم غير طعم العناد اللى من غير هدف يعنى عناد من اجل العناد و خلاص .
انا عارف انك ممكن تقولى ان ده رأيك ودى مدونتك و انك حر تنشر اللى عندك لانك مش بتشتغل عند حد !!!!!!
بس انا شايف ان ده حقى عليك زيى زى اى حد بيهتم بموضوعاتك و بيحث عن المصداقية فى كلامك .
الكلام كتير وانا مش صحفى متمرس و دى مجرد محاولة منى بس انا فعلا قررت انى ابطل تأمل و ناوى اتفاعل و اكتب و انشر واحاور اللى عاوز يتحاور بأدب .
هما كلمتين قلتهم و ريحونى شوية و لحد ما انشر تانى مستنى رد الاستاذ و ائل عباس او ردودكم على موضوعى ده و مستعد لأى نقاش او حوار او توضيح .